內地學生為加飯餸化「虛弱妝」博同情 凹陷輪廓似吸毒者驚動警方

內地大學生圈子近日掀起「虛弱妝」熱潮，故意將自己妝容化得面無血色，甚至用陰影粉化出凹陷效果，打造過份纖瘦虛弱嘅樣貌，希望博取飯堂阿姨同情加餸，不過事件卻驚動警方。

一名男學生拍攝實測影片，指化上「虛弱妝」後到飯堂，阿姨俾嘅餸菜份量係平時一倍，雖然佢喺片中註明「劇情需要，請勿模仿」，但仍然有唔少學生仿效呢個妝容到飯堂「呃飯食」，阿姨以為佢哋營養不良，唔單止會俾多啲餸，更會窩心提醒唔好食辣同埋要戒口等等。內地網站更設有唔少「虛弱妝」教學短片，步驟簡易，例如先用陰影粉塗於眼眶、臉頰、顴骨、下巴位置，營造骨瘦如柴嘅凹陷感，再在嘴唇上塗上粉底遮蓋原先唇色即可。

由於「虛弱妝」過於逼真，與吸毒者模樣相似，有網民向警方舉報，經警方查證後發現事件與吸毒無關，不過警方就高度關注，喺官方社交平台呼籲大眾唔好再模仿「虛弱妝」，以免引起不必要誤會，同時宣揚「禁毒」意念，指吸毒後就會變成「虛弱妝」外貌，勸誡學生唔好嘗試吸毒。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！