全民造星4︱B4戲劇故事好催淚 A2組Elka被淘汰

ViuTV選秀真人騷《全民造星IV》喺噚晚（25日）繼續進行第二回合淘汰賽，第四輪對戰由許廷鏗（Alfred）領軍嘅A2對梁祖堯帶領嘅B4，參賽者們都有出色嘅表現，甚至連評判們都話今輪對戰係最難決定，不過勝出嘅只有一隊，所以最終B4組勝出，A2組嘅Elka慘被淘汰。

第四輪對戰先出場嘅係A2，成員包括Day、阿Yo、Mei Mei、Elka、Tania及阿蛋，佢哋以跳唱形式表演歌曲《Candy Ball》，佢哋青春又有活力，一邊跳一邊甜笑對住評判，難怪連導師許廷鏗都話佢哋係「糖尿病組合」。佢哋嘅表現得到評判讚賞，當中韋羅莎就話自己好怕睇呢類可愛嘅表現，不過佢哋就好成功咁令佢睇得舒服，而泳兒亦稱讚佢哋跳舞跳得好齊整。

之後就到B4出場，而成員包括咖哩、Ivy So、暐翹、Gao、Sarah及Karen，佢哋喺台上戲劇《六條金魚》，而呢個表演故事係改編自內科醫生咖哩嘅一個經歷，當時一個伯伯病得好重，不過佢仲仍然記掛住屋企嗰六條金魚，最後伯伯過身，六條金魚嘅下場就不得而知，而佢哋就係飾演呢六條金魚。今次佢哋呢個戲劇表演得相當催淚，連後台嘅參賽者都睇到眼濕濕。表演完結後，評判都大讚佢哋做得好好，好似陳輝陽就話自己好似睇緊Mini Movie。

最後就輪到兩隊「Dance Battle」，兩隊跳MIRROR嘅《BOSS》，參加者都發揮超水準，深得評判們嘅喜愛。不過比賽係殘酷，始終都有一隊要落敗。最終B4組以四盞燈勝出，而A2組嘅Elka就慘被淘汰。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！