全民造星IV︳港日混血莎莎出線 又係薛家燕旗下女團前成員 有人做埋韓團偶像

ViuTV王牌節目《全民造星IV》尋晚首播，第一輪比賽會由2位參賽者1對1比拚，勝出者可以進入60強。第一對爭出線嘅分別係港日混血兒莎莎（坂部佩莎）及大學醫科一年級生阿Wing（余施熲）。2位都係睇得唔唱得，不過莎莎以長腿辣舞先拔頭籌，成功晉身60強。

尋晚播出嘅片段見到，20歲嘅莎莎試鏡時表現趣怪，深受評判歡迎。莎莎有9年演出經驗，因為佢係薛家燕旗下女團Honey Bees前成員。計落，「家燕媽媽」又捧多一位打入演藝界嘅新血，佢先係真正「造星者」！

Honey Bees喺2010年成立，成員都係來自薛家燕有份嘅藝術學校女學生。家燕姐作為經理人兼老闆，經常安排Honey Bees一齊出席活動，團隊亦都有唔少演出機會。

第一代成員有5位，其中之一嘅莊錠欣(Elkie)曾經加入韓國女團CLC，至今年初先退團。

Honey Bees唔少畢業成員大個之後都參加選秀比賽，莎莎以外仲包括《全民造星III》嘅殿軍雲浩影(Cloud），以及《聲夢傳奇》嘅五強之一鍾柔美。此外亦有前成員參演TVB劇集，喺《她她她的少女時代》演年青版田蕊妮嘅區明妙、《平安谷之詭谷傳說》飾演蘇玉華個女嘅陳沛妍都係Honey Bees出品。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！