全紅嬋巴黎奧運再奪金 賽後充分表現17歲少女可愛感 家人曾拒豐厚獎金靠農務維生

再下一城，全紅嬋於巴黎奧運跳水項目，女子十米高台決賽，為國家隊奪金，成功衛冕。

中國跳水猛將全紅嬋與陳芋汐較早之前出戰巴黎奧運跳水女子雙人10米台決賽，以總分359.10分勇奪金牌，為國家隊增添第7金。全紅嬋於賽後充分表現出17歲小妮子嘅可愛感，不但開心得直接跳上拍擋陳芋汐身上，更喺接受媒體訪問時藉陳芋汐無留意而偷吻對方，喺後台又跑到郭晶晶面前對手機鏡頭送吻。另外，喺賽後記者會上，見到中國滑雪選手谷愛凌後化身小粉絲，除咗大讚對方好靚，更加開心得手舞足蹈，雙方更深深擁抱。

全紅嬋自細喺廣東邁合村成長，家境清貧，2014年接受跳水訓練並於4年後加入廣東省隊。於上屆東京奧運中，全紅嬋以14歲之齡喺女子10米台單人跳水決賽中奪金；比賽後，全紅嬋透露希望用獎金畀媽媽治病，更指自己平時訓練完就回家，從未去過遊樂園和動物園。全紅嬋奪金後聲名大噪，老家一度成為遊人打卡熱點，亦有唔少廣告商邀約代言及企業送贈鮮花、20萬人民幣慰問金、商舖和房屋，不過國家跳水隊和廣東跳水隊唔希望全紅嬋被各種商業活動耽誤，於是拒絕廣告商邀約；至於其他贈品，亦被全紅嬋家人一一拒絕，只收下鮮花。

據央視新聞當時對全紅嬋家人嘅採訪報道，父親全文茂表示，家庭唔可以依靠女兒名氣坐享其成，而要靠自己去闖；哥哥全進華當時又表示現階段只係妹妹嘅開始。全紅嬋一家人選擇繼續靠自己種植農產品，由哥哥將父親所種植嘅水果放喺網上促銷，開創抖音帳號以有趣方式致力推廣農產品，以維持生活。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！