出拍拖禁令冚緋聞 姜濤同網紅親暱行街

現年19歲的姜濤去年參加ViuTV真人騷《全民造星》爆紅，曾自爆未拍過拖的他，早前雖被揭在中學時與女生在街上十指緊扣，但他解釋是「俾人玩」，對方從未愛過自己。日前《蘋果》讀者Iris透過「爆相爆片」，表示早前於傍晚約7時，見到姜濤與女生同遊銅鑼灣。Iris說：「我坐緊雙層巴士，咁啱望落去見到個頭髮咁colourful嘅男仔，就認到佢係姜濤，身邊仲有個女仔。」

相中見到姜濤與長髮女子身處SOGO對面大街，兩人都戴上口罩，不過姜濤的口罩拉得很低，他身上的格仔大褸也曾在拍廣告時穿過，所以很易被認出。當時長髮女子似挨落姜濤胸膛，兩人貼得相當近。據悉長髮女子就是有「墨爺」之稱的網紅Anjan，曾客串ViuTV劇集，樣貌有少許似日本乃木坂46主將白石麻衣。姜濤向來鍾情日本妹，曾經透露自己很喜歡有村架純。

問到姜濤是否拍拖，他以短訊回覆指對方是「普通朋友」。至於女方挨近他胸膛，姜濤以「笑到喊」的emoji公仔回覆，並「吓」了一聲，然後說：「我諗應該係太多人逼住。」但相片中兩人附近人流不多，姜濤再解釋：「咁我就唔知，可能係啲人諗太多。」

姜濤昨日在中環出席慈善活動，他再度否認有戀情：「嗰日喺銅鑼灣遇到佢，之後佢去搭車，我送佢去，可能角度好近，其實係角度問題。」他身旁的《全民造星》監製黃慧君（花姐）也為他解圍：「我發誓，我人頭擔保，佢就想喇，一定要過我對眼先可以做佢女朋友。」姜濤表示對方是剛相識的朋友，之前工作時也有見過，問到兩人有否發展機會，他笑說自己沒有話事權：「要經過花姐。」花姐笑說：「你唔好講到我咁專制，佢有時間都唔肯整隻腳，點會肯拍拖呀！」

問姜濤是否不敢拍拖？他說：「今次嘅事，大家傳來傳去，就變到好似真，所以我唔會諗拍拖，照呢個狀況，就算真係有個適合，我都未考慮住，而家拍拖唔係我一個人嘅事，仲要對好多人負責，所以我唔會咁輕易拍拖。」是否擔心fans不喜歡？姜濤否認：「佢哋話知道呢個報道，無論真定假，佢哋都好開心，佢哋都好大方。」他坦言下次會小心：「我同女仔接觸都要好小心，一旦有啲被人誤會嘅動作，好多人就會誤會。」不過姜濤透露母親已開綠燈：「媽咪都有問我真定假，不過佢都認為呢啲係好正常嘅事。」