分手後首度見人 洪卓立為操肌身型暴漲衝向200磅

洪卓立同《膠戰》主持之一劉沛蘅(Hillary)拍拖年半，突然於上周宣布分手，原因係「因了解而分開」。尋晚立立為商場活動演唱，係佢分手後首度示人，一上台立即震撼全場 － 向來瘦削嘅立立變成中佬身型，面圓圓兼有雙下巴！

立立仲自爆而家為操肌而瘋狂增磅，可以盡情食消夜，體重仲爆增40磅去到200磅，但之後就要地獄式減肥。活動上司儀問佢增磅係咪有咩目的，立立只係話「想靚仔啲」，而之後佢就解釋因為自己頭大，如果以原本身型操肌，即使練出鋼條身型都只會顯得個頭更大，於是就要增肌再減。之前洪卓立同Hillary未分手時一齊出席活動，已經見到身型發福，當時立立都係話要操肌，加上佢IG都有post健身相，相信佢真係bulk緊嘅。

洪卓立受訪時被問到分手後心情如何，佢就話OK嘅，因為仲有工作可以寄託。立立又澄清自己唔係爛賭，之前同朋友買馬贏過7萬幾蚊出過post之後已經冇玩，點知就被網民記住，甚至成為分手導火線。立立話同Hillary仲有兩句，至於會否復合？佢只係話萬事皆有可能。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！