雅虎香港新聞 【判決前夕】李永達：受矚目程度較高，把握時機出回憶錄
2014年雨傘運動9人被控公眾妨擾罪，案件明天（9日）宣判。自審訊結束後已經近四個月，9人明天將在庭上再聚首。九子之一的李永達，趁判刑前出版回憶錄《判刑前的沉思》，談及中共在港的滲透工作，被問到為何選擇這個時機，李永達說：「有啲資料我喺呢一、兩年先搜集到，另外，我判刑前，我受矚目嘅程度係高啲嘅，咁我要掌握呢個時機。」
眾新聞在判決前夕訪問九子，問及各人近四個月的經歷、面對可能入獄的準備、裁決對香港的意義。其中陳淑莊與鍾耀華不欲受訪。以下是李永達的回應：
審訊結束（12月14日）至今近4個月，怎樣運用這段裁決前的日子？
寫書、出咗我本書，同埋我平常嘅生活，去旅行、去咗西班牙。我無咩為咗4月9號特別預備，我正常咁生活。寫書係2017年有呢個諗法，2018年嘅10月、11月先開始寫。因為佢檢控我，我覺得我要下定決心。嗰本書係將我自己20、30年嘅社運經驗寫出嚟，同埋有幾個章節講共產黨喺香港嘅滲透，亦都同我預期一樣，有報道，即係好多人留心呢樣嘢，最少我達到目標就係，大家對中國共產黨喺香港嘅滲透工作比較留心咗啲。（點解揀喺呢個時候講中共滲透？）當然有啲資料我喺呢一、兩年先搜集到，另外，我判刑前，我受矚目嘅程度係高啲嘅，咁我要掌握呢個時機，平時相對可能無咁多人留意。我估會多啲媒體報道，即係咁樣嘅好時機，將我心目中想講嘅嘢講出嚟。
用咗4個月寫書。其實我寫呢本書，我用iPhone寫，我寫字好慢嘅，iPhone將口講嘅嘢變為文字，咁入到去坐監就唔可以用iPhone，我寫大綱、寫啲資料，出到嚟再寫。（諗到下集主要寫咩？）未，但我諗緊一啲題目。
屋企就好簡單，主要係太太啫，我爸爸媽媽都過咗身，我有七兄弟姊妹。我哋有聚會，一切如常，無乜話多啲時間見，總之有聚會我就去，大家食飯傾偈，都係正常咁生活。當然呢排多咗飯宴，大學同學成30年無見我喇，而家要坐，咁食次飯，我無理由推人架。所以呢4、5個禮拜食嘅飯多咗好多，一日食兩次呀、飲吓咖啡呀，我盡量都抽時間見吓朋友。啲朋友都好耐無見過，佢哋唔係政圈嘅，但睇新聞知道我就要判。
4月9日有可能還柙，做了甚麼準備？
我知呢個可能性會出現，我唔係太多準備，我唔想over prepare，因為我一路個原則係：就算佢判我坐監，我希望一切如常，唔想成日都諗住呢樣嘢、干擾我日常嘅生活，我見朋友、食飯、飲酒、我喺民主黨嘅工作、我而家喺大學教緊書（中文大學教公共政策碩士課程），我想任何嘢都正常咁進行，唔好畀佢干擾。
（鞋、褲、書之類有準備嗎？）我未預備。就算要預備都唔會好耐，1、2日就搞掂。我覺得唔需要個腦成日諗住呢啲嘢；第二，政府可以告我、判我坐監，但係我作為參與民主運動嘅，還有700萬市民，係唔應該受呢啲影響。佢好難監禁700萬人，或者嗰100、200萬民主派，佢唔可能捉晒去坐監。我哋話畀人聽，我哋唔會因為佢呢個檢控而受到驚恐，亦都唔會影響我哋正常嘅生活。呢個就係我嘅原則，所以我無乜嘢特別預備。
我太太（陳樹英）無同我傾過呢樣嘢，我哋好平常，間唔中講幾句，無話特別坐低食餐飯傾我第時坐監點。你知我太太都做過政治工作，做過區議員、做過區域市政局議員，佢無特別同我傾，亦都無擔心乜嘢。我就唔係十分擔心太太，不過我同我嘅朋友講、同我嘅黨友講，如果我真係坐監呢，你哋得閒就約陳樹英傾吓偈、行吓山，因為我喺入面陪唔到佢 。
你覺得裁決對於香港社會的意義是甚麼？
我諗如果我哋九個都做得好，係話畀人聽，呢種政治檢控我哋係唔怕嘅。當然個法官點判呢，我相信法官係公正，告嘅嗰個當然唔公正，你知係政治檢控。但係我哋最少唔會驚恐，話畀市民聽，就算面對呢啲壓逼，唔好退卻。我哋能夠做嘅，就係畀大家有一點嘅支持同一點嘅堅持。我哋堅持嘅嘢，唔會因檢控而stop。
觀看原文： 按此連結
