劇集播出預咗受靶 朱智賢悔對「燁」緣 絕不重蹈覆轍

無綫小花朱智賢與人夫黎振燁因拍劇暗撻，令事業一度跌入谷底。事隔2年隨該劇見街，已走出陰霾的她重提舊事，對事件悔不當初，承諾在事業及感情上不會重蹈覆轍，而事件令她與男友謝東閔的感情更加穩固。

朱智賢（朱朱）有份演出的無綫劇集《食腦喪B》近日播出，劇中的朱朱性格硬淨，雖然朱朱自言本身性格軟弱，跟劇中角色相去甚遠，但事實上她比自己想像的要堅強。2年前她與人夫黎振燁因拍攝《食》劇而撻着，事業及形象插水，2年後的今天她已重新出發，敢於面對劇集播出後的輿論：「我有心理準備會有聲音，係有少少壓力，控制唔到其他人講乜，惟有自己睇開啲。（會唔會睇番套劇？）會！想睇番自己演技。我都Move On咗，做人要向前看，唔可以望番轉頭。面對唔到點喺呢行立足。」

與謝東閔感情更深厚

朱朱稱事件發生後，當下恍如世界末日。這段時間，除了家人無條件支持外，還有男友謝東閔的默默陪伴：「佢唔係會宣之於口嘅人，但會行動上同我一齊行山、做運動，佢話做運動個人就會開心同正面啲。（感情深厚咗？）一定會，有經歷先知有幾穩固。（反過來會唔會做到咁包容？）都會原諒對方，但可能要長啲時間去消化，佢係一個容易放下嘅人。」她稱2人現時感情穩定，但仍未有結婚計劃，希望先在事業上打拚。

此外，她感激肯給她機會的每個人，承諾會好好珍惜，不會重複犯錯：「當然後悔，對我事業同人生影響好大，我亦因為呢個經歷而突然成長。（感情上警惕自己？）一定會，得到咁大個教訓，仲學唔識就有問題。」