劉溫馨有「霧水桃花」 彭慧中被爸爸催婚

東方日報
·1 分鐘文章
彭慧中(左)與劉溫馨的古典美人Look,夠晒靚!
彭慧中(左)與劉溫馨的古典美人Look,夠晒靚!

劉溫馨與彭慧中(Phoebe)化身古典美人,牛年獻瑞,日前齊齊於灣仔拍攝旗袍靚相,大晒美好身段,期間更對精緻的玉石紅棗、角仔、蟶子等愛不釋手,玩個不休,十足十小孩子一樣,相當搞笑!

肖馬的溫馨被指今年會有霧水桃花,她慨嘆過去遇的都是「霧水情緣」:「真係遇到幾多,所以到依家都係單身,通常了解之後,發現唔啱都唔會拍拖,寧缺莫濫。」Phoebe跟溫馨一樣,都是「宅男」女神之選,但去年甩拖的她,亦自嘆欠好姻緣,不過牛年都不會急住追,會繼續享受單身慢慢揀:「農曆新年會跟爸爸媽媽去親戚度拜年,因為啲表姐都結咗婚同有小朋友,令到家族愈嚟愈多人,好熱鬧!(有冇被長輩催婚?)梗係有,我爸爸都有份催,但我搵得嘅當然希望係長久嘅,所以要慢慢揀。(有冇合格嘅追求者?)冇,依家有啲難度,因為疫情少咗出街,冇乜點識新朋友。」