勁敵當前難獨攬 JW恨攞「飛躍」 3個分都制！

歌手JW加盟無綫後演出機會多，事業登上高峰，更在下月無綫頒獎禮中成為最多提名女藝員，自言求「飛躍進步女藝員」獎作鼓勵的她，認同劉穎鏇、劉佩玥是最強勁敵，故望獎項能「一出三」，一同上台攞獎就皆大歡喜。

入行12年的JW，自去年由歌手轉戰無綫，瞓身工作有回報，於《萬千星輝頒獎禮》中角逐「飛躍進步女藝員」、憑《愛心灌溉》及《Wish》提名「最受歡迎電視歌曲」、憑《痞子殿下》入選「最受歡迎電視拍檔」共4項。成為最多提名女藝員的她日前受訪時說：「過去呢一年自我挑戰咗好多，有咁多提名覺得努力係有人睇到，冇白費到。」

讚劉穎鏇好Fit

問到最期待的獎項？她不諱言是「飛躍進步女藝員」，過去一年真心付出百分百努力：「無論喺唱歌、導師、演戲各方面都進步好多。以前拍MV都10幾個鐘，但原來做演員可以做足20、30個鐘，我拍《痞》時，最高峰係52個鐘冇瞓過，所以體驗過做演員後，對無綫所有演員都有一份尊重，如果唔係真係鍾意演戲，根本冇可能捱到。」

至於心目中的最強勁敵，她首選劉穎鏇：「拍《痞》時經常喺化妝間相遇，佢真係好Fit，為保持身材只係食雞肉，而多產嘅劉佩玥表現都好好，亦大機會攞獎。」「飛女」獎只得一個，她妙想天開謂記得去年羅天宇與丁子朗齊獲「飛躍進步男藝員」，所以希望跟劉穎鏇及劉佩玥同獲獎：「畀多啲鼓勵大家嘛。」她恨到出口的獎項還有「最佳劇集」及「最受歡迎電視拍檔」：「純粹希望《痞》會贏，反而歌曲獎冇乜特別去諗，唱劇集歌只係想幫齣劇，唔係為個人。」

回顧過去一年，她覺得收穫比付出多，其中最大驚喜是賺得友誼，跟同拍《痞》的陳瀅、周嘉洛、朱敏瀚及張頴康成為好友。另外，她發現成功入屋，觀眾緣大增：「唱歌時啲Fans群係由10幾至30幾歲，但依家連小朋友或者年長啲嘅都知我係邊個，真係好開心嘅！」