雅虎香港新聞 【又惹事】周永恆出事紀錄大全 打老婆 自認人渣 唔識英文講英文
曾經係藝人嘅周永恆又有新聞！尋日佢因為去年12月涉及喺尖沙咀一間便利店嘅打鬥案而上庭……即係跪警察嗰單呀。今次已經唔係佢第一次惹官非。如果計埋其他出軌、出醜事件，file幾呎厚！
藏毒判感化
2004年，周永恆喺觀塘寓所樓下被埋伏警員截查，佢身上搵到俗稱「五仔」嘅毒品，周永恆被判藏毒罪成，需要接受18個月感化令。
偷食兼打老婆 向外母吐口水
周永恆同拍拖多年女友趙頌茹(Yu)2010年奉子成婚，但係到2014年，周永恆被爆同模特兒公司助手兼拍檔嘅港視小花劉依靜（Ruby）有婚外情，周永恆同Yu因此發生爭執，Yu被周永恒推跌令面部受傷，Yu報警處理。周永恆被控傷人罪，判守行為18個月。
唔夠一個月，周永恆去到Yu外家要求見兩個女，被Yu父母拒絕之後爆粗兼吐口水，周永恆再次被捕，今次被判監2個月緩刑18個月。
自認人渣求原諒 唔俾贍養費
周永恆喺出軌事件後接受訪問，聲淚俱下咁讀出公開悔過書，自稱人渣兼鬧自己「賤格，鹹濕同貪玩」，但係同Yu都係離婚收場。本來周永恆答應俾贍養費Yu同兩個女，但係2個月後冇再俾錢，Yu要出山賺錢養家。
情史好繽紛 離婚半年再婚再做老豆
同劉依靜拍拖一年後分手，周永恆同細佢9年嘅女團O.M.G成員黃芊詠（Cherie）拍拖，但係唔夠一年就傳出二人糾紛不斷，Cherie聲稱俾周永恆打，周承認有郁手，但係都指責Cherie send情慾短訊騷擾。後來周永恆同內地女子陳薇拍拖，並喺同前妻Yu正式離婚唔夠半年就再婚，而且再婚後3個月就三度做老豆，我真係恭喜你呀～
訪問講「好shuffle」冇人明 嬲爆走人
陳淑蘭主持嘅訪問節目邀請周永恆做嘉賓，遇著巴辣嘅蘭子周永恆唯有亂拋英文單字，話自己「好shuffle」，聽到一頭霧水。而蘭子嘅窮追猛打令周永恆終於頂唔順，錄影期間爆粗之外仲中途離場，事後又出post指責電視台令佢中伏。
