同譚俊彥鬥煮! 方力申未戰先淆底 唔搵陳瀅試食

·2 分鐘文章
譚俊彥(右)有開餐廳經驗,方力申則自嘲唔識煮,點鬥呀!
譚俊彥(右)有開餐廳經驗,方力申則自嘲唔識煮,點鬥呀!

自嘲「屎忽撞棍」成為節目《男神廚房》其中一位冠軍「廚男」的方力申,對晉級挑戰經營餐廳未戰先淆底,又耍手擰頭拒邀緋聞女友陳瀅幫襯,並貼心為對方速逃拒合照解畫!

由無綫綜藝節目《男神廚房》延伸的《男神廚房開業喇!》,除找來其中3位冠軍級「廚男」譚俊彥、方力申及張馳豪坐鎮外,還有關禮傑、伍允龍及靚女助手陳聖瑜、關楓馨、葉靖儀參與,眾人分4日比試,每日招待共80位已訂座食客兼小量Walk-in名額。

眾人昨日齊集餐廳為節目造勢,睇落以私下有開餐廳的譚俊彥佔優,他甫抵達即急不及待去廚房視察,受訪時卻謙稱怕到時煮唔切。小方則搞笑表示再競賽是天意,上次參加節目則是「消業障」,並自嘲零廚藝,奪冠後被質疑造假:「只係可能啱啱好落中調味料好食,我有叫Book咗枱嗰啲食客唔好嚟,嚟嘅話就後果自負!」

為「速逃」解畫

問會否邀請緋聞女友陳瀅光顧?小方抵死地說:「叫佢嚟即係害佢,講到明唔識煮,仲叫人嚟?」談及日前「前後排」欣賞胡鴻鈞演唱會,問為何女方落荒而逃?小方反叫記者幫手問對方,又爆陳瀅避合照後曾聯絡他講「唔好意思」:「佢話唔想成日圍繞住緋聞,我同佢講,咁樣走咗去仲難觸摸。」又乘機「投訴」另一緋聞女友馮盈盈:「上次喺節目,佢批評我煮啲嘢辣,好明顯係佢嘅問題,題目係辣吖嘛!」

此外,率先上陣孖伍允龍做拍檔的關禮傑,自言心情有點緊張,希望「打好個頭」。問其女兒關楓馨會否偏心只幫爸爸?她搞笑說︰「可能內心會唔覺意幫多啲,但應該唔會嘅,我好公平!」

關楓馨拍住爸爸關禮傑上節目,會唔會偏心?
關楓馨拍住爸爸關禮傑上節目,會唔會偏心?



我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能