吳君如女兒陳是知出席金像獎成焦點 9月將赴英升學隨時入行?
吳君如與陳可辛女兒陳是知(Jillian)上周六(15日)迎來17歲生日,吳君如喺社交平台大曬為囡囡於餐廳慶生短片,非常溫馨。生日翌日,陳是知即與陳可辛結伴出席《第四十一屆香港電影金像獎頒獎禮》,蹺住爸爸手臂行紅地氈,一身黑色低胸西裝打扮更成網民焦點,更被大讚可愛又靚女,笑容相當甜美。
喜歡演戲和唱歌跳舞嘅陳是知,近年開始接觸幕前工作,去年與父母一同接受雜誌訪問,更自薦做《闔家辣》臨時演員,客串公司接待員一角;佢嘅私人IG亦不時貼出健康泳衣照及與朋友玩樂嘅照片。被問到係咪有意入行及想與哪位男演員合作時,陳是知即向陳可辛作出眼神求救,笑指唔知,後來先表示自己喜歡英國歌手Harry Styles,陳可辛代解圍指囡囡個清單好難達到,表示佢係Harry Styles嘅No.1 fans,自己要打出國際先幫到佢。陳是知又被問到最喜歡哪位MIRROR成員,陳可辛又笑住代答:「全部喺屋企見過」,仲叫記者唔好難為囡囡。
去到噚日,佢哋一家為銀行拍攝嘅廣告出街,佢喺片中展示舞技兼表示想以女團成員身份出道,演出流暢自然。唔少網民睇完都大讚Jillian,例如「有潛質 個樣有觀眾緣,不討厭」、「囡囡係老豆餅模」、「jillian好靚女」、「好靚女,似兩姐妹」「Ah Jill 好靚」
陳是知自細被吳君如用心裁培,修讀畫畫、網球等多個興趣班之餘,更被禁止食零食和喝汽水以保持有規律嘅生活;吳君如又會每日與囡囡一齊睇電影,閒時都會帶佢逛影音店買電影光碟,唔知係咪因為咁而令陳是知對表演產生興趣呢?日前,吳君如、陳可辛及陳是知首次全家人出動,連同冬叔夏春秋為銀行理財產品拍廣告,吳君如與陳是知更以母女檔出席活動,吳君如表示9月將陪囡囡到英國升學,如果佢有意於演藝圈發展,就計劃送她去美國讀戲劇,認為囡囡要做演員嘅話,仲有一段路要去學習。
按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可換領限量新人禮,立即下載!