吳尊一家四口全中招 親身經歷後呼籲發冷發熱唔好沖涼

前台灣男團飛輪海成員吳尊，近年專注在中國喺內地發展，並喺今年3月舉家移居上海。內地放寬防疫限制政策後，各地疫情升溫，連曾大讚內地控制疫情非常好嘅吳尊亦難逃確診命運，拍片宣布一家四口全中招，記錄自己初步確診及康復嘅情況，直言「真的被新冠打倒了」，同時亦有分享一啲小建議，當中包括唔好沖涼。

喺影片中，吳尊一開頭唔相信自己已經中招，仲做多一次快速測試，並宣布一家四口全部確診。之後，吳尊就表示經過一星期嘅休養後，一家四口已經康復，而佢就係佢哋當中病情比較重嘅一個，直言「真的被新冠打倒了」，佢發咗三至四日高燒、發冷發熱、肌肉刺痛，頭痛、喉嚨痛、鼻塞及咳嗽。佢仲話因為突然中招嘅關係，好多工作被逼取消，所以壓力非常大。

吳尊再話自己相信係最好嘅安排，所以無論發生咩嘢事，都要往好嘅方向去諗，要堅強同調整心態，要有耐心，因為嗰幾日會非常難受，不過好快會過去。最後，吳尊亦有分享一啲小建議，除咗食多啲營養豐富嘅食物及補充維他命之外，佢仲建議唔好沖涼，因為佢親身經歷喺發冷發熱嘅時候去洗澡，令佢感覺更加難受。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！