吳沚默生擒好友零尷尬

由黃智雯與陳展鵬主演的《隱門》臨近結局，劇情愈趨緊湊。前晚一集劇情講述吳沚默飾演的「波波」，霸王硬上弓生擒飾演「逸風」的阮浩棕，震撼觀眾眼球，不過吳沚默笑言拍攝時蝦碌連連：「我同阮浩棕好Friend，佢算係我訓練班師弟，之前合作得好開心，所以拍呢場戲冇尷尬，反而好多笑料。好似有幕我要解開佢條皮帶，但解極都解唔開。同埋有幕佢要將啲毒品撒落我塊面，但佢又打極都打唔開包嘢，而我又要好High咁叫，所以係搞笑多過尷尬。」對於演繹迷幻樣獲讚，她表示全靠之前當編劇時，曾做過相關資料搜集，故拍攝時得心應手。