周嘉洛暫別「金城安」首當男一 傳劇接劇夥陳豪演時裝版《鹿鼎記》

周嘉洛憑TVB處境劇《愛·回家之開心速遞》廢青「金城安」一角成功入屋，喺《萬千星輝頒獎典禮2019》中更奪得「最佳男配角」獎項，備受力捧。周嘉洛喺早前更暫別處境劇劇組，「升呢」擔任古裝喜劇《痞子殿下》男一，同劇演員包括陳瀅、張頴康、王灝兒（JW）、曹永廉以及朱敏瀚等。最近亦有消息指周嘉洛將會開拍新劇《四十二章經》，更與視帝陳豪一齊擔正。

周嘉洛喺5月已經完成喺《愛．回家之開心速遞》嘅戲份，除咗觀眾大感不捨，就連佢自己都話好唔捨得，亦都想喺之後拍完正劇入返劇組。不過，相信一眾《愛·回家》劇迷仲要繼續等待一段時間，事關網上盛傳周嘉洛將會劇接劇，喺拍完《痞子殿下》後將會開拍《四十二章經》；有傳《四十二章經》係一部懸疑時裝喜劇，亦係經典劇集《鹿鼎記》時裝版，將由周嘉洛與陳豪擔正演出，龔嘉欣、譚凱琪以及江嘉敏亦有份出演。

演員陣容配搭相當新鮮，不過官方暫時未有確定。負責該劇嘅金牌監製陳維冠接受媒體訪問時指，演員方面唔方便透露太多，僅承認劇集喺籌備階段，同埋與《鹿鼎記》有關係；至於周嘉洛亦表示未接到公司確實安排，並指如果可以同陳豪合作，將會好期待。對於現正拍攝中嘅《痞子殿下》首當男主角，周嘉洛就希望盡量放輕鬆，令自己表現更好。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！