周星馳一句點醒 蔡思貝甘做臨記捱鬧

視后蔡思貝事業穩步上揚，過去幾年劇接劇的她，今個農曆新年決心做「宅女」。入行不久已有機會登上大銀幕的她，坦言就算捱鬧，亦希望有機會跟周星馳合作一次，一嘗心願。

今日正式踏入31歲的蔡思貝，既做了視后，又做了業主，感情、事業兩得意，難怪甜笑表示相當滿足。她之前爆出不少新聞，亦試過被網民惡意針對，直言有段時間確實有點迷失。

踏入虎年，她希望觀眾可以用雪亮的眼睛評審其作品，問到網上的抨擊是否對她構成很大影響？她坦言：「有段時間真係擾亂咗，如果因為某啲原因就唔公平看待我嘅作品，我覺得對成個工作團隊好唔公平。我當然希望大家用番普通睇劇、演技、角色嘅角度去睇我，你好憎我都好，但唔好因為咁而憎我嘅戲劇，你憎我嘅話，背後憎我啦！我唔想連累到其他劇組同事一齊糟糕，因為我好怕影響到人，如果因為我而令到其他人嘅付出被抹殺，因為有蔡思貝大家就唔睇，咁其他演員、導演及劇組人員擺嘅心機都冇晒，呢樣嘢係我最唔想。你點搞我都得，但唔好搞我嘅事業，一搞到我工作範疇上嘅嘢，我就會好唔開心，因為我真係將所有嘢放喺工作上，希望新一年大家高抬貴手！」

思貝又表示有機會想再拍電影，更望與周星馳及曾國祥合作：「曾國祥嘅電影好有血有肉，啲劇本好寫實，好想有機會同佢合作。而如果可以同周星馳合作，佢點鬧我都好，要我做臨時演員都好，好想有一次機會。佢有句說話好啟發到我，聽講有次佢企喺台側邊，有人同佢講：『周星馳你企番出嚟中間呀！』佢話：『我企邊度咪邊度就係中間囉！』我覺得係真嘅，唔需要理人太多，唔需要同人比較。」

難得放假做「宅女」

去年至今共拍了3劇的思貝，自爆農曆新年假期做「宅女」：「以前好多圈中朋友拍完一部就飛去第二度充電，我一次都未試過。之前劇接劇，唔想錯失任何機會，唔捨得咁奢侈。到依家想去做時，又實踐唔到，惟有做住『宅女』先。」