超IG-able!單色藝術 / 風情小島餐廳

揀餐廳都係一門藝術。最好就又靚又好食又抵食……不過要搵間符合晒咁多條件嘅餐廳就唔係咁容易喇。今次介紹2間分別位於觀塘同尖沙咀嘅餐廳畀大家,都係超IG-able得嚟食物質素都有水準的。一間感覺就悠閒啲casual啲,一間就高貴大方啲,各有特色。

Be Leaf(觀塘)

觀塘唔係淨得工廈café嘅,呢間地舖喺街角位置,但裝修就靚到好似去咗風情小島咁,特別係戶外座位嘅梳化、藤椅、乾花拱門等,兼且仲招待毛孩,難怪一開業已經喺IG上被洗版,吸引到好多朋友仔去打卡啦。食物供應方面,則有多款西式美食同埋甜品選擇。

糯夫

嚟到必試「糯夫」,即係芒果糯米飯窩夫。外層微脆嘅窩夫,咬開中間煙煙韌韌,仲有粒粒糯米𠻹。原來餐廳製作時,真係將椰漿糯米飯放落窩夫機熱壓㗎。面頭嗶埋芒果肉同椰子雪糕,真心有啲似食緊芒果糯米飯,係幾有創意嘅。

法式焦糖卡士達梳乎厘班戟

大熱甜品梳乎厘班戟有4款口味,包括原味、tiramisu、 楊枝甘露同今次要介紹嘅法式焦糖卡士達。坊間嘅梳乎厘班戟都有唔同嘅口感,而呢度就係厚實得嚟又偏重空氣感。即叫即製,叫完大約等20-30分鐘就有得食,焦糖卡士達呢款有塊焦脆餅喺面,淋埋奶蓋,甜甜der。

焙茶軟心巴斯克烤微焦芝士蛋糕

嚟呢啲打卡café,總係感覺要叫返件cake先至啱數。今年人氣甜品王巴斯克烤微焦芝士蛋糕呢度都有得食,仲要係自家製嘅𠻹。選用日本焙茶粉製作焙茶軟心口味,茶味濃郁清香,蛋糕亦有微微焦香。另一款洛神花味灑上紫色花瓣,打卡度又再提升咗。

刺身大蝦海膽他他

介紹咗幾款甜品,係時候講下前菜同主菜。集合多款食材嘅刺身大蝦海膽他他,以小圓盒盛載住。選用甜身嘅阿根廷紅蝦(a.k.a天使紅蝦),切碎後混入乾葱、法葱、蜜糖芥末汁等,仍滲出陣陣奶油香,加埋加拿大海膽同 仿魚子醬,啖啖都係鮮味。配搭埋墨西哥餅皮食都幾夾。

邪惡熱溶芝士醬烤西班牙伊比利亞豬肋骨配薯條

大大份豬肋骨,面頭淋滿烤至金黃色嘅芝士醬,真係冇改錯名:邪惡!豬肋骨骨肉比例均勻,先經過慢煮16個鐘後,再上醬烘烤,令到肉汁依然可以保留得到,但骨肉就輕易分離,食落好方便。而師傅更特意用咗車打芝士同mozzarella等3種芝士去製作,務求做到味道同拉絲都有效果。

MONMONO (尖沙咀)

行經尖沙咀山林道,唔難發現一間以單色藝術作為主題嘅餐廳。呢間餐廳內外嘅裝修都只採用Regal Blue作為色調,有種高貴優雅嘅感覺,亦好啱鍾意搵pantone colour打卡嘅朋友仔。而餐廳本身更旨在融合藝術於生活中,會定期放置唔同藝術家嘅作品喺餐廳內作展覽,甚至如果遇到知音,更可按藝術家意願出售作品。呢度主打法日料理,菜式多以日式食材、法式煮法呈現,多種湯底、汁醬都自家調製,心思一流。

炒活藍青口‧辣肉腸‧蕃茄忌廉汁‧蒜蓉吐司

師傅特意選用嚟自澳洲嘅新鮮活藍青口,因其味道較濃郁,肉質嫩滑,仲帶有鮮甜。製作時加入白酒同自家製半乾車厘茄,使之鮮甜味更為突出。配上嘅蒜蓉吐司混合咗生熟蒜製作,既有辛味亦有粒粒口感,建議可蘸點藍青口湯汁一併品嚐。

火灸藍蝦冷素麵‧龍蝦番茄清湯

法國藍水晶蝦同餐廳嘅藍色主題不謀而合,蝦肉肥美,爽彈鮮甜。由於本身已屬刺身級數,師傅亦無需使用太多調味,只係輕輕加鹽同油,再用火槍燒一燒就食得,希望可讓食客感受到佢最原始嘅味道。藍水晶蝦下的小豆島素麵,口感較軟綿,帶有淡淡麻油香。龍蝦番茄清湯亦真材實料,用上大量本地番茄濃縮精華至1/10嘅清湯,混埋熬製成16個鐘頭嘅龍蝦清湯而成,味道清甜。

自家製三色意大利雲吞

三種顏色嘅意大利雲吞,分別加入咗墨汁、紅菜頭蓉同埋香草製作自家製麵糰。除咗顏色配搭突出外,餡料亦有別於傳統嘅菠菜同芝士,換入鴨肉、鴨肝醬、鴨肝慕斯同澳洲和牛面頰肉,濃郁惹味。至於牛肝菌汁底,都係細心地用咗兩款牛肝菌製作,一款乾一款新鮮,取其唔同嘅質感,豐富口感。

日本稻庭手打烏冬‧ 慢煮 A5 和牛臀腰肉‧ 法式蘑菇和牛清湯

A5 和牛臀腰肉係成隻牛相對冇咁肥,但又會帶有油脂香嘅部位,肉質軟身,更可睇到細緻嘅油花分佈。師傅先將之輕輕煎香以鎖住肉汁,再以低溫慢煮嘅方法處理,加入調味後再二次封煎,所以食得到邊位嘅脆口感。湯底係法式蘑菇和牛清湯,用咗大量湯底蘑菇、牛骨、雞骨、蔬菜等熬足十幾個鐘,難怪啖啖滲有肉香。選用較幼身嘅稻庭烏冬,煙靭有咬口,而且仲易於掛汁,索盡湯底肉汁精華。

牛角包窩夫

完整嘅一餐當然要包埋甜品。近期好興嘅牛角包窩夫呢度都有得食,仲有幾隻味揀添,分別係焦糖香蕉、花生醬及煉乳同埋鹹蛋。全部即叫即製,窩夫脆身,牛油味濃,製作時加入薄砂糖更可增添脆感。雖然睇落好多都係甜魔組合,但食落又冇想像中咁甜膩,主要係因為配料都由餐廳自家製作,可以控制糖嘅分量。焦糖忌廉係減糖版,焦糖醬則至甘苦味道,配合埋一齊就冇咁甜啦。

心動不如行動!有興趣就快啲約埋三五知己去嘆下美食!快啲bookmark定啦!

*以上圖片只供參考,所有食品以實物為準. 食品供應因餐廳而異

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能