2024團年飯好去處！4間全新中菜廳推介

新年重有兩星期就到啦，團年飯想帶啲新鮮感畀屋企人嘅，可以睇吓呢幾間近年先開嘅中菜廳，總有一間啱你心意～

潮州菜與粵菜經典融合 莫云

主打潮州菜同粵菜融合嘅菜式～古法崑崙鮑甫係滿漢全席菜式之一，其實係燜龍躉皮扣鮑魚，準備功夫足足三日！經過一系列乾蒸、浸發、除腥、去魚鱗除雜質等工序，上枱前再將龍躉皮、鮑魚連同鮑汁加熱輕煮，龍躉皮盡吸鮑汁醇鮮，而南非吉品溏心乾鮑則煮至香軟入味。鹽焗黑松露富貴雞都係必食菜式，選用本地泰安雞，肉味香濃，雞肚釀入鮑魚、栗子、黑松露片等食材後，以鮮荷葉加粗海鹽包裹烤焗，雞肉散發清新荷香。重有金湯蟹肉乾撈翅、松子龍蝦鬆、魚子海膽水晶蝦同龍吐珠等都係招牌菜！

秘製黑椒煙燻燒鵝 瓏庭

呢間親民啲嘅中菜館，燒味係餐廳嘅拿手菜式～如獨家秘製嘅黑椒煙燻燒鵝，皮脆肉嫩，外皮陣陣油香，選用香氣十足嘅黑胡椒同煙燻方式烤製，比起一般燒鵝多一份風味。砂鍋珍菌乾燒龍躉球都值得一試，龍躉球彈牙之餘炒得好有鑊氣，配埋簡單嘅調味最能突顯鮮味；另外陳皮沙薑生煎雞，肉質嫩滑，鹹香嘅沙薑配上微甘嘅陳皮香，好出色。

江南鮮魚湯泡飯 江南．翡翠

位於海港城，以上海菜作主打嘅全新中菜！必食點心有叁色小籠包，包括冬蔭功、黑松露帶子同蝦頭油鮮蝦三款味道，其中蝦頭油鮮蝦嘅香氣極濃，啱晒海鮮控。招牌江南鮮魚湯泡飯奶白色嘅湯底以鮮魚熬製而成， 鮮甜濃郁，每粒白飯吸收晒魚湯精華，配搭鮮魚魚塊、冬菇、蔬菜等簡單配料，以簡單烹調方法盡顯食材原味。另外招牌蟹肉大湯包係巨型版嘅大湯包，混合蟹肉、瑤柱同豬肉做餡，皮薄料足，湯汁飽滿鮮甜。

懷舊風中菜館 歡樂大排檔

想體驗舊時嘅香港風味，可以試吓呢間以七、八十年代舊香江為設計靈感嘅中菜館！用上戲棚、麻將枱等作裝飾，真係好似返咗去舊時咁。晚市供應大排檔鑊氣小炒同懷舊菜式，如波士頓龍蝦伊麵，龍蝦新鮮彈牙，伊麵吸晒芝士味同龍蝦鮮味添。重有唔係成日食到嘅雞蛋焗魚腸，一上枱就香噴噴好惹味。另外亦供應新年錦繡宴，啱晒一家人去食！

文：Yanica
編：Cathy