【地道星期五影院】《不脫襪的人》

今日想同大家重溫套1989年由陳友執導嘅港產片《不脫襪的人》。男女主角分別係張曼玉同鍾鎮濤，電影當年獲得香港金像獎6個獎項提名，最後贏得最佳攝影（鮑起嗚）、最佳美術指導（司徒衛鏞），以及為張曼玉帶來第1個最佳女主角獎項。

《不》可以話係張曼玉轉型成為實力女演員嘅一個重要里呈碑，但坊間有關呢套電影嘅資料或評論唔算多。故事背景設於1967年香港暴動，講述2個身在香港小人物嘅愛情。鍾鎮濤飾演一個無牌的士司機阿恭，願望係做車主；張曼玉飾演發明星夢嘅黃小姐，希望有朝一日可以飛黃騰達，想上位嘅佢同時做人好有原則，對於導演無理要求一律拒絕，結果喺片場被人打一身。

2人因為住樓上樓下，互相睇唔起又被迫相處，黃小姐需要阿恭車出車入充場面，而阿恭需要黃小姐份車資生活，將黃小姐片場受欺凌嘅事看在眼裹，漸漸2人互生情愫。他們兩人決定合作，重新開始，典賣一切，買了一輛的士。可是在慶祝新生之際，他們捲入示威群眾，被警方拘捕。接著他不理暴動者的警告，不肯罷駛，結果車毀人傷。

黃小姐對於阿恭人財兩傷感到非常愧疚，認為自己帶俾阿恭惡運，決定做富商陳保羅嘅情婦遠赴美國。碼頭內，她焦急地看著時鐘；阿恭無視外面暴動群眾繼續和軍警對峙，堅持趕去碼頭挽留黃小姐……

《不》入面嘅張曼玉有多個造型，唔同顏色嘅裙代表住女主角唔同嘅心情，一片睇哂60年代潮流，而且喺重塑舊年代香港風貌做得十分精細，中間仲有一段戲中戲加群舞，全片非常詩情畫意！

今日再睇，比起男女主角差啲錯過彼此、最後有情人終成眷屬嘅愛情，反而對阿恭嘅經歷更加印象深刻。佢屬於低下階層，收入微簿，明明見盡上流虛偽（因為車過唔少富貴人家），又明白真相嘅醜陋，但偏偏份人中立，唔表明立場，結果兩面不是人，無示威又被警察拉，無幫班警察又被示威人士燒車！阿恭嘅故事教訓我地，沉默都唔一定可以事不關己、全身而退！