投奔初夏！夏日主題下午茶推介

又到炎炎夏日，準備好約埋家人朋友一齊去嘆冷氣，食個tea未呢～今期搵咗幾間夏日主題下午茶畀大家，快啲bookmark啦！

夏日香芒下午茶 SAVVY

以三層架盛載十一款精緻鹹甜美點，全部都以芒果作主題，好清新呀！甜點有濃郁細膩嘅芒果芝士蛋糕、清香嘅茉莉芒果蛋卷、幼滑嘅雲呢拿芒果奶凍同香脆嘅芒果朱古力泡芙等。鹹點則推介燒帶子、甜椒配芒果汁，鮮甜嘅帶子同芒果搭配層次好豐富；而鵝肝醬配芒果忌廉芝士多士亦值得一贊，鵝肝豐富嘅口感同順滑嘅芝士幾好夾。

供應時間：即日起至2024年7月31日，每日下午3時至5時30分

「和風夏抹」下午茶 樂聚廊

呢間餐廳同護膚品牌Tatcha首度攜手合作推出「和風夏抹」下午茶，擺盤充滿和風嘅優雅感，鍾意日式元素嘅朋友要嚟試吓喇。綠茶慕絲蛋糕呈樹葉形狀，小巧別緻，表層唧上綿滑綠茶忌廉，內層有抹茶脆脆增添口感，入口微甘有餘韻。艾草雲呢嗱泡芙將艾草葉混入吉士醬中，美味同健康都兼備。鹹點方面推介龍蝦三文魚籽三文治，鹹鮮味美。另外經典英式鬆餅仲有原味同綠茶口味𠻹，伴以紅豆醬、柑橘柚子果醬同德文郡忌廉，每一啖都齒頰留香。

供應時間：即日起至2024年8月31日，每日下午3時至5時30分

熱帶鮮果下午茶 Three on Canton

充滿熱帶風情嘅熱帶鮮果下午茶，選用西瓜、熱情果同芒果等匠心炮製各式精美鹹甜點。甜點芒果朱古力酥皮卷好香脆，加入芒果更加清新；果味雪條就解暑一流～鹹點方面有酥炸青口配荔枝莎莎，青口鮮味滿滿，配荔枝莎莎又增添層次，又可以解油膩感。

供應時間：七至八月期間，每日下午3時至5時

「榴槤盛薈」週末下午茶自助餐 大灣咖啡廳

榴槤控注意！呢間酒店推出「榴槤盛薈」週末下午茶自助餐，以芳香撲鼻嘅榴槤果肉製作出多款鹹甜點。甜點包括榴槤葡撻、榴槤冬甩、榴槤芝士蛋糕同榴槤芒果糯米飯等；鹹點就有榴槤咖央三文治、特色榴槤薄餅、榴槤斑蘭卷，以及含有啖啖新鮮榴槤嘅炸榴槤球，配埋榴槤奶昔特飲，榴槤控未食已經流晒口水！

供應時間：即日起至2024年9月15日期間，每逢週末及公眾假期

文：Yanica
編：Cathy