大台窮得只剩下港姐 《星星探親團》不如叫《港姐探親團》

大台慣咗做Copycat，眼見ViuTV勁拍旅遊節目，佢地都唔執輸，直頭將10點半時間變「旅遊時間」，繼《在那遙遠的地方‧古巴》、《有乜好過去Camping？》、《關西攻略》之後，今晚就有《星星探親團》，搵黎十二位二三線藝人，好似麥美恩、李施嬅、苟芸慧、麥明詩，同埋無咩觀眾緣嘅蔡思貝同陳凱琳，分別重返佢地成長地，好似加拿大、英國、澳紐、日本等，實行一連十五集實地回憶佢地嘅成長日記，不過十個有九個都係港姐，不如索性叫《港姐探親團》好過啦？

麥明詩被指白撞
成輯最爆應該係十優港姐麥明詩（Louisa）返母校劍橋拍攝時，被指喺學校舞會遭人驅趕，被質疑係「白撞」，更有當地同學話佢排牙唔靚，唔似係港姐囉，不過相信呢d片段應該都被「河蟹」曬！講返劍橋，喺康河上泛舟可以睇盡劍橋大學建，好似數學橋、國王學院禮拜堂、吉布斯教學大樓等，又或者踏單車遊覽都得。

蔡思貝講假學歷？
蔡思貝曾被爆涉假學歷，一個月讀完菲律賓比立勤國立大學學位風波，今次比安排去紐西蘭講中學讀書生活，今次佢聲稱係畢業後首次返去，行程都係自己安排，既然返到紐西蘭，緊係要親親大自然，佢會走入農場同羊咩玩遊戲，更會首次駕駛飛機，不過我想聽你講返學位事件多d。

陳凱琳清純學生look
而家晚晚見到陳凱琳，估唔到九點半睇完，十點半又見，佢本身唔煩，我都覺得煩啦！今次佢返成長地溫哥華，搵返一班由細玩到大的朋友，而佢個清純學生look亦會曝光，一對彊屍牙應該係selling point掛，好似係除非唔係。

苟姑娘返加拿大小法國
近年愈來愈肥嘅苟姑娘，身型真係好趕客下，佢今次返到加拿大嘅Montreal，尋回讀書回憶同講少少初戀喎，更與李施嬅玩刺激遊戲。反而Montreal個地方仲吸引，當地有加拿大小法國之稱，是當地嘅法語區，處處見到大師級的塗鴉，整個充滿藝術感。

岑麗香交流3個月都叫探親？
至於香香公主曾係日本名古屋做交流生3-4個月咁大把，今次佢會返名古屋母校，拍攝期間更遇熊本地震。不過名古屋本身景點唔太多，大多港人都以此為落腳點，上昇龍道同立山黑部等，聽講今次佢都有去白川鄉！