失驚無神玩突襲 黃子恆鬼咁恐怖 嚇窒黃智雯

·2 分鐘文章
黃智雯讚陳展鵬是很好的聆聽者。
黃智雯讚陳展鵬是很好的聆聽者。

黃智雯於新劇經常被造型驚嚇的黃子恆「突襲」,搞到精神崩潰,要靠「解藥」陳展鵬減壓。她笑言以前做空姐時經常聽鬼古,絕不細膽!

陳展鵬、黃智雯與黃子恆日前於西貢拍攝無綫新劇《隱門》,化了「鬼妝」的子恆戴上有色隱形眼鏡及化白面妝,其角色相當特別,專門出來嚇智雯,搞到女方精神錯亂,更有情緒病,智雯說:「劇入面我成日突然間見到佢,一陣喺側邊彈出嚟,一陣又喺天花板。(你本身怕鬼?)我冇乜特別靈異經歷,以前做空姐都聽過好多古仔,不過我算大膽,出trip唔怕自己一間房。」

子恆曾於《降魔的2.0》及《乘勝狙擊》分別跟智雯及展鵬合作,他笑言大家久別重逢。問到戴有色隱形眼鏡拍攝會否感不適?他說:「唔緊要,公司好好,搵咗啲質素最好嘅隱形眼鏡畀我, 監製想個感覺驚嚇啲,每次出場都好似驚慄片咁。」

陳展鵬撐小品劇

而智雯透露與展鵬於劇中關係微妙,她以「解藥」形容對方,因其角色受盡生活壓迫,每逢遇到問題,都會找展鵬傾訴。問到拍攝期間情緒長期處於繃緊狀態,會否對她正常生活有影響?她坦言:「都有,所以有時拍完返到屋企,我唔會即刻瞓覺,坐最少半個鐘先去沖涼,等自己沉靜吓先。」

拍攝期間,正享受家庭樂的徐榮與囡囡「包包」路過,跟劇組打招呼,展鵬說:「見到一家人咁樣真係好開心,自己成日要開工唔得閒,所以一有時間都會陪個女。依家好多人心態唔同咗,唔會淨係掛住搵錢,要有生活質素同品味,之前見到偶像郭富城做跨年騷,帶埋老婆同囡囡一齊到場,成件事昇華咗。就好似我哋依家做演員咁,唔係一味拍跳樓、掟人落街就係最好睇,劇情都要有訊息、養分,有時小品形式嘅劇集仲有質素、仲正。」

黃子恆化上鬼妝,經常「彈出彈入」嚇黃智雯。
黃子恆化上鬼妝,經常「彈出彈入」嚇黃智雯。
徐榮(左)與囡囡途經拍攝現場,跟劇組打扮呼。
徐榮(左)與囡囡途經拍攝現場,跟劇組打扮呼。



我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能