#娛樂Hashtag：「夢幻組合」愛恨交纏 劉青雲對住韋家輝 考驗修養

演技出神入化的劉青雲，在新片不再做「癲佬」角色而變身神探，對把他折磨到盡的導演韋家輝又愛又恨，視跟對方合作是個人修養的大挑戰，皆因導演愛以「喂」、「邊個」作稱呼。

由影帝劉青雲主演的英皇電影《神探大戰》終於在香港上映，日前他偕湯怡及導演韋家輝接受《#娛樂Hashtag》主持Angela專訪，大談拍攝時鮮為人知的趣事。青雲和韋導被視為「夢幻組合」，青雲跟「鑊鑊甘」的韋導拍檔早已做足心理準備，而最「難頂」一次是拍攝電影《一個字頭的誕生》時，感覺是挑戰演員修養的最大考驗，他爆seed說：「場場動作戲又長兼一take過！韋導突然話見到邊個呀！再嚟過！喂！見到邊個呀！佢唔知拍緊戲㗎！嗰吓真係要忍得住脾氣㗎！」

湯怡湊女好有耐性

新片中青雲的神探角色性格是「不能忍受自己犯錯，連其他人犯錯都不能接受」，現實中，他自言要視乎對方犯錯原因，最難忘有次幫襯馳名雲吞麵店，以為柯打最穩陣的雲吞撈麵一定冇中伏，可是送上麵時卻被嚇呆：「我真係呆咗，通常啲雲吞就喺麵上面，或者喺麵下面，但呢碗就成個亂葬崗咁，碎濕濕。」當時麵店員工即場道歉，更換另一碗。

雖然每次參與韋導的電影，青雲都會吃盡苦頭，可是卻無法拒絕他的吸引力，直言在其心目中，韋導不是魔鬼亦不是天使，而是有兩面體的導演，他說：「如果分得咁清楚，就快樂到不得了囉！」

在新片中一句「與怪物戰鬥，小心自己成為怪物！」問到育有一女的湯怡湊BB時可會變成「怪物家長」？她信心十足表示不會：「好奇怪，我對住個女，極度有耐性，以前都唔係咁，係做咗阿媽之後變咗！」想知更多訪問內容，就要立即收睇《#娛樂Hashtag》。