嫌拍檔年紀大 黎諾懿想搵「小鮮女」對手

「疫境廚神」黎諾懿前晚亮相《繽FUN Live》，與主播俞詠文隔住個Mon傾偈。講到他於《萬千星輝頒獎典禮2020》連奪4項提名，包括最佳男主角、最佳節目主持等，他聞言笑說已打定輸數：「咁即係證明已經冇獎拎，因為被分散投資。」又即場呼籲大家投「最佳男主角」予曾合作的劉丹。

講到其「疫境廚神」稱號紅遍全港，他笑言冇諗過變「長壽」節目：「只係當時無綫覺得喺疫情期間冇乜節目，就搞咗個網上平台叫我分享煮嘢食，點知一煮就煮咗咁耐！」並自爆其實不喜歡節目：「因為一直做就代表疫情未完，所以好想快啲停咗佢，但點知最後變咗大型綜藝節目《今晚請客》，至於點解會搵陳敏之一齊主持？因為我煮嘢食唔能夠一心多用，煮住講嘢就會好多甩漏，一係燶咗、一係辣親，有次因為邊煮邊講，唔小心畀火燒到眼睫毛！」

「小春雞」亂入

直播期間，網民頻呼喚其囝囝出場，原本已睡着的「小春雞」竟真的「亂入」出鏡，又跟爸爸向觀眾打招呼：「大家好，我係小春雞。」搞到網民勁Hyper，狂派心心兼畀Like，而當被問幾歲時，囝囝竟搞笑話想去Poo Poo（便便），笑翻全場！一直恨生女的黎諾懿，直言因疫情關係已暫停「造人」，深怕老婆及胎兒受到感染，待疫情過去才再開Turbo努力。

至於明年大計，他希望綜藝節目及拍劇雙線發展，又搞笑說：「好享受同對手做戲，我開始揀對手，要20至25歲嘅年輕女仔，25歲以上要諗諗，可能會推劇，李佳芯早幾年仲得，依家就唔好喇！希望有啲新衝擊。」