家族榮耀|前港隊泳將朱鑑然工作機會不斷 胸肌腹肌仲好搶眼
TVB熱播劇集《家族榮耀》播出以來備受好評,除咗勾心鬥角劇情及實力派演員演技大鬥法極具看點之外,新生代演員同樣獲得網民關注,當中包括飾演甄芯(楊茜堯飾演)細佬Nick甄誠嘅朱鑑然(Kevin),喺劇中仲同「家姐」劉沛蘅(Hillary)有感情戲。
現年33歲嘅朱鑑然,喺2歲時就隨家人移民加拿大溫哥華,直至97年回流返港讀書,去到2007年再返回溫哥華就讀名校英屬哥倫比亞大學(University of British Columbia ) 主修人文地理。Kevin屋企人希望佢可以嘗試不同嘅事物,所以自細就畀佢學好多唔同嘅嘢,例如畫畫、滑雪、鋼琴及陶瓷等等,最終佢發現自己鍾意游水,14歲更開始成為香港游泳代表隊成員,曾代表香港參加亞運會、世界大學生運動會及世界短池游泳錦標賽。另外,佢仲係短池400米混合泳香港紀錄保持者。
咁究竟呢位前香港游泳代表隊成員係點入行?朱鑑然其實喺因緣際會之下接觸模特兒工作,之後就加入娛樂圈。Kevin靚仔有型兼外表高大威猛,胸肌同腹肌亦非常搶眼,自2016年開始工作機會不斷,參演多套電影及劇集拍攝,例如《骨妹》、《P風暴》、TVB《無間道》、TVB《家族榮耀》、ViuTV《瑪嘉烈與大衛》及ViuTV《熟女強人》等等。佢今次喺《家族榮耀》嘅演出成功令觀眾留下印象,仲紛紛留言叫佢加油及大讚佢演技不俗,例如「甄誠演得不錯哦」、「你演得好好 Add oil Support you」、「日日開電視就係為左睇你整電腦 support」及「見到甄誠出場,第2次睇你演戲,演得好好,明天再支持」等等。
按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可換領限量新人禮,立即下載!