前日本領事館家廚主理 將軍澳新和洋料理餐廳 必食宮崎和牛三文治

鍾意食日本菜又想有啲新鮮感,將軍澳呢間主打當代和洋料理嘅摩登居酒屋就值得一試。由曾擔任日本駐美國芝加哥領事館首席家廚嘅三原光史先生主理,糅合入行20年中周遊列國得到嘅靈感,同新鮮空運到港嘅海產,設計多款別具特色嘅菜式,當中A4宮崎和牛三文治同醬油漬吞拿魚天使意粉都係推介!

餐廳主廚三原光史先生
餐廳主廚三原光史先生

koi選址將軍澳,同鄰近嘅姐妹店三原鐵板燒一樣由日籍主廚三原光史先生親自主理,佔地約2,600平方呎,有兩間VIP房,室外用餐區更係寵物友善!選擇從壽司卷物、特色小食、日式燒物、鍋飯到甜點應有盡有。預計之後更會推出午市同Happy Hour Menu啊。

辣味吞拿魚米餅($98)
辣味吞拿魚米餅($98)

主廚三原先生嘅私心推介,米餅選用嚟自日本宮城縣、黏度適中而且口感柔軟嘅一見鐘情米,捏成薄身飯糰再半煎炸後,外脆內軟而不失嚼勁。配搭吞拿魚蓉、辣味芝麻醬同墨西哥辣椒jalapeño,層次豐富而且微辣醒胃。

博多地雞一夜干雞翼($42)
博多地雞一夜干雞翼($42)

串燒方面就推介以產自九州福岡嘅博多地雞製作嘅一夜干雞翼,雞翼皮風乾再燒食落特別脆口,脂香十足但唔會太油膩。裡面嘅雞肉亦保持嫩滑多汁。

博多特色燒飯團($32)
博多特色燒飯團($32)

同樣以一見鐘情米製作,呢份賣相與別不同嘅飯團就加入咗鰹魚昆布湯製作,令飯粒咬落有日式高湯獨特嘅鮮味同香氣。燒嘅時候再加自家製醬油同紫蘇葉調味,最後用紫菜包住,食落更香脆。

黑椒汁炸雞配熏醃白蘿蔔他他醬($88)
黑椒汁炸雞配熏醃白蘿蔔他他醬($88)
黑椒汁炸雞配熏醃白蘿蔔他他醬($88)
黑椒汁炸雞配熏醃白蘿蔔他他醬($88)

以日式南蠻炸雞為靈感,炸雞依然係炸至金黃色、外脆內嫩,醬汁則改為黑椒汁同他他醬。他他醬加入煙熏白蘿蔔,雖然煙燻味道唔算突出,但蘿蔔有增加爽脆口感,而且醬汁帶酸,可以平衡油膩感。

A4宮崎和牛三文治($218)
A4宮崎和牛三文治($218)

呢度亦有近年大熱嘅和牛三文治,選用A4宮崎和牛沾上麵包糠然後炸至半熟,切開可以見到粉嫩嘅牛肉同分佈細膩嘅油花,麵包亦烤至脆身,一齊食咬落外酥內嫩。中間係三原先生特別炮製嘅醬汁,當中有麥粒味噌,原顆麥粒增加甜味同口感。

照燒汁鵝肝鍋飯($168)
照燒汁鵝肝鍋飯($168)
照燒汁鵝肝鍋飯($168)
照燒汁鵝肝鍋飯($168)

法國菜常見鵝肝同蘋果嘅組合,喺呢度變成日式鍋飯。同樣選用一見鍾情米,吸收咗照燒汁同鵝肝嘅油分之後,粒粒晶瑩剔透又香噴噴!法國鵝肝熟度啱啱好,入口即溶。加入日本富士蘋果一齊煮飯,清甜多汁可以一解油膩。

醬油漬吞拿魚天使意粉($138)
醬油漬吞拿魚天使意粉($138)

呢道意粉係仿照日式冷麵,所以係一道非常適合夏天食嘅冷盤。幼身嘅天使意粉煮完再過冷河,配搭味道微酸嘅醬汁同醬漬吞拿魚,非常清爽。可以配搭Wasabi同日本山藥(淮山)泥,增添味道同口感變化。

Koi
Koi

koi

地址:將軍澳唐俊街18號The Parkside第一座地下G07號舖

文:Cathy.H

相、片:Wilfred Chui

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能