專訪《亞洲超星團》｜冼靖峰直言「跳舞係自己優勢」 Hugo為夢想奮鬥 丁子朗：自豪話俾人聽呢啲係HK Pop

由中港合作推出嘅選秀節目《亞洲超星團》熱播中，節目集結咗65位嚟自唔同地方嘅「超星練習生」，當中亦都包括嚟自香港嘅代表。早前，Yahoo娛樂圈自家節目《Yahoo Lunch K》就搵嚟其中三位香港代表，「聲夢學員」冼靖峰（Archie）、黃奕斌（Hugo）同由主持、演員跨界到挑戰組男團嘅丁子朗（丁丁）。由出道歌手、演員、主持再挑戰男團，三個人都重新變返做練習生，原來為嘅都係跳出Comfort zone（舒適圈），趁後生突破自己，亦都希望帶到不一樣嘅自己俾觀眾；佢哋三個仲率先劇透咗啲之後公演嘅必睇位，想知係咩就繼續睇落去啦！

把握機遇突破自己 丁丁：呢個契機、緣份仲唔係俾我去試

當《亞洲超星團》參賽者消息公布嘅時候，令大家最驚訝嘅一定係見到丁丁參賽。相信唔少人對佢嘅印象都會係「佢係演員同主持喎，佢識唱歌跳舞嘅咩？」丁丁直言當時就連公司同事都對自己有質疑，甚至乎係阻撓，例如話：「不如你唔好出去獻醜啦」。不過丁丁認為既然有呢個機會點解唔去挑戰一下自己，仲強調係天時地利都俾咗機會佢：「入到去個個都話我超齡，我係6月生日，Last interview係6月，7月開始拍，所以interview嘅時候仲係25歲，就連月份都係一個契機，呢個契機、緣份仲唔係俾我去試，趁住自己仲有力水嘅時候就去試。」正正係呢份唔服輸同有野心嘅性格，令到丁丁夠膽參加呢個節目挑戰自己，決心展示另一面俾觀眾。

講起喺近期造型嘅轉變備受網民討論，甚至話以前嘅造型更加適合佢，丁丁就唔認為呢啲評價有壓力，反而覺得網民嘅評價不斷幫緊自己搵到最適合自己嘅造型：「走向Idol呢條路啱唔啱我呢？我自己都未知，每日都仲試緊，但係好多網民好好咁好熱衷話俾我聽『你呢個真係唔好睇！你呢個好睇啲喎』，基本上網民就變成我嘅造型師，改善呢條路嘅一個方向，我覺得幾好。」

跳舞片被網民恥笑 Archie直言「跳舞係自己優勢」

一向歌藝了得嘅Archie早前就因為節目嘅跳舞片被網民恥笑，佢亦都自嘲：「跳嗰陣唔覺得自己咁搞笑，望返條片覺得『嘩！咁樣樣嘅』。」而佢亦冇因此而灰心，認為經過呢件事明白好多時候唔可以太相信自己，都要喺啲有經驗嘅人身上吸收先得，更指跳舞其實係自己「優勢」之一：「每一個人都知我唔識跳舞，所以我只要的起心肝去練會有進步，大家會好容易睇得到；如果本身跳舞已經好厲害嘅人進步嘅幅度未必會咁大。換個角度去睇，我話到俾人聽只要我努力其實冇嘢做唔到。」Archie亦都透露下年有機會挑戰跳唱，自己同公司亦都積極向呢個方向做準備。

為圓高中做偶像夢想 Hugo唔認為發展慢：可以出到自己作品已經好開心

至於同Archie一樣同為《聲夢傳奇1》學員嘅Hugo至今仍未有個人作品，原來錄完《聲夢》後佢就返到中央戲劇學院完成學業，之後先再繼續發展演藝事業。被問到會唔會覺得自己發展被其他人慢，佢就直言唔會，暫時都係喺自己計劃之內：「當時我花咗好多心機考呢間學校，嗰時已經諗定我會係最後一個出歌，所以我唔介意咁樣，只要最後可以出到自己作品俾大家聽已經好開心。」佢亦都直言知道自己知名度比其他人低，但亦都明白做咗選擇去讀書就會失去啲嘢，所以依然滿意現狀，至少可以Keep住做自己鍾意做嘅嘢，當然亦都希望自己繼續進步，有朝一日可以得到觀眾認同，成為歌手藝人中嘅「舞蹈擔當」。

劇透節目最值得期待畫面 丁丁：話俾人聽呢啲就係Hong Kong Pop

節目雖然只係啱啱播完第一次公演，不過其實一班參賽者已經拍攝完第二同第三次公演舞台，Archie就透露印象最深刻嘅係第三次公演，更透露表演過後罕有地感動落淚：「拼盡全力，識嘅嘢都擺晒落個表演到，我係跳出晒Comfort zone之餘同自己講無論點都要完成得好呢個表演」；而Hugo就認為係第二同第三次公演舞台，因為係真正做到自己想做嘅表演；丁丁就覺得係第二次公演，因為當時係以廣東歌演出嘅佢哋獲得導師Rain盛讚：「最感動嘅地方係Rain老師同我哋講如果韓文歌係K-Pop嘅話，呢首就係Hong Kong Pop，覺得呢個成就感好大，作為香港代表可以將我哋嘅粵語歌話俾唔同國籍嘅人聽呢個就係我嘅嘢，坦白講嗰一刻係好自豪，好開心可以得到一個Super Star嘅認可，話俾人聽廣東歌係有人聽！」