差啲組「墳場組合」! 張敬軒簽唱片公司遭騙財

·3 分鐘文章
張敬軒自爆受騙經過,真係慘慘豬!
張敬軒自爆受騙經過,真係慘慘豬!

張敬軒在紅館個唱自爆曾遭騙財之餘更傷埋自尊心,以為可用「墳場組合」之名圓心願出道,豈料遇娛圈騙子累他空歡喜一場!不過前晚終達成夢想,初嘗當組合C AllStar成員一晚,更甘願奉上「叱咤樂壇至尊唱片大獎」跟隊員有福同享。

張敬軒前晚在第10場《The Next 20 演唱會》上自爆悲慘往事,指簽首間唱片公司時遇上騙子,對方提出只須付5萬元,就可推出一首獨唱及半首合唱歌:「我問點解會有合唱歌,當時嘅公司就話因為我個樣有病咁,又黑又瘦,所以幫我打造組合囉,個組合就叫『銀河傳說』!」入世未深的他還以為終受神的眷顧,因是獨子身份,覺得有拍檔齊上台是美事,故滿心歡喜「課金」等待成團,但結果說好的「銀河傳說」沒有誕生,始知中了伏。

靠C AllStar圓組合夢

他又指「銀河傳說」如「神預言」,皆因其故鄉廣州以前確實有地方名叫「銀河」:「嗰個地方等同依家香港嘅和合石!當然我最後都係冇去到『銀河』啦!所以今晚要圓一吓我想做組合嘅美夢,請我隊友出嚟!」組合C AllStar的4位成員隨即現身,以5子姿態合唱《集合吧!地球保衛隊》。

C AllStar稱自小聽軒仔的歌長大,其中成員陳健安(On仔)為證「冇吹水」,即興清唱了軒仔歌曲,又說:「讀中三時,最鍾意軒仔一首歌《遙吻》。」5人在台上互相恭喜在《叱咤》頒獎禮大豐收,C AllStar稱頒獎禮結束後,有支持軒仔的網上直播:「冇諗到佢咁忙咁攰,都喺直播度提起我哋嘅專輯,所以要『謝主隆恩』。」

軒仔就讚在頒獎禮上聽到4子的歌很感動,又平心而論指他們的《人類世》應是「至尊大碟」,覺得「叱咤樂壇至尊唱片大獎」的得主應是C AllStar,4子即有感而發:「如果獎項有兩個就最圓滿,可以一齊上台領獎。」軒仔就「豪爆」說: 「好呀!一陣我返去劈開佢,分一半你哋。」

另外,無綫藝人馬貫東亦帶同富家女友Christy睇騷,兩人表現恩愛不時親密咬耳仔,馬貫東受訪時說:「呢排有劇出好多宣傳,又拍緊新劇,變相少咗時間陪女友同屋企人,自己都少出街,嗰日演唱會已經係呢1個月少有陪到佢咋!(冇人認到你咩?)就係冇囉!哈哈!」

張敬軒在個唱上成為C AllStar的成員之一。
張敬軒在個唱上成為C AllStar的成員之一。



我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能