巴黎奧運｜何詩蓓：每次見香港區旗都與觀眾揮手 對港人親身支持感難以置信｜Yahoo

【Yahoo 新聞報道】何詩蓓在巴黎奧運 100 米自由泳決賽，游出 52 秒 33 奪得銅牌，是她今屆第二面獎牌，亦成為首個兩屆奪 4 塊奧運獎牌的港隊運動員。她賽後接受訪問表示，對成績感到滿意，賽前已經知道競爭非常激烈，能夠贏得一面獎牌並非容易，對此很開心。何詩蓓又說，奧運期間每次見到香港區旗她都會與香港觀眾揮手，對於港人特意飛到巴黎支持她感到難以置信。

" It means a world to us "

何詩蓓在東京奧運及今屆巴黎奧運，一共贏得兩銀兩銅佳績。她表示：「其實我冇咁樣諗，話要成為最多獎牌嘅香港運動員。我覺得我自己嘅 goal 都係希望可以盡全力，去發揮最佳嘅水準。可以攞到咁多獎牌，當然係已經好值得開心嘅事，我都係好 proud。咁希望可以 inspire 到其他嚟緊會比賽嘅運動員，同埋而家正在訓練、希望可以去到奧運嘅小朋友，希望可以俾啲 positive energy 佢哋，令佢哋知道佢哋都可以做到。」

何詩蓓表示，留意到有香港觀眾特意飛到巴黎，親身支持港隊運動員。她賽後多次感謝香港人：「好多謝大家，一路咁樣去支持我同埋其他香港運動員。我啱啱頒完獎，行個圈嘅時候，每次見到香港旗我都同佢哋揮手，因為我知道⋯⋯因為我好難相信香港人會特登飛嚟巴黎去睇我比賽。我從來冇想像過會發生嘅事，所以我真係好 appreciate 大家嘅支持同大家嘅心血。咁奧運仲有好多日，希望大家可以繼續支持香港運動員，因為你哋嘅支持係，it means a world to us。」