雅虎香港新聞 【引渡修例】質疑李家超「答非所問」 商人佘繼標：好多中小企腳軟
自由黨周二（21日）舉辦修訂《逃犯條例》答問大會，參加會議的香港中小型企業聯合會創會會長佘繼標，會後指保安局局長李家超「答非所問」，無法釋除中小企的疑慮。佘繼標事後接受眾新聞訪問時表示：「而家好多中小企都腳軟」，稱中小企在內地營商時要「被迫行賄」，擔心修例一旦通過，不少小商家會被引渡回內地。他又稱，擔心地方政府或會與地產商合謀，由地方政府就港商多年前的行為提告，藉以迫令港商賤價賣地予地產商。
佘繼標屬建制陣營，被問到對修例的立場時稱：「我支持修例，但最好押後3、5、7年，等國家能夠反貪腐倡廉，中央執法做得好先執行，而且希望之前嗰啲就唔好追究。」他又指， 中小企是夾心人，政黨無法表達他們的擔憂，故他要出來表達意見。不過，被問到可會上街抗議時，他卻避而不答：「唔知，我一個人有咩用，去同唔去，一個人冇咩作用。」
64歲的佘繼標，1983年創立新生電機科技公司，當時乘著內地改革開放的時機北上發展，廠房位於深圳，至2008年佘繼標據報因為代公司簽署作借貸擔保人，在公司被追債下，一併被債主申請破產，目前仍有經商。佘繼標分別於1993年及1995年獲選為香港及世界十大傑出青年，曾任河南省政協港澳區委員，亦曾為觀塘委任區議員。他曾任會長的香港中小型企業聯合會於1996年成立，目前約有數千名會員，多年來獲政府及中聯辦官員出席其會董就職典禮，屬建制陣營。北京和中聯辦已表態撐修例，但佘繼標仍希望透過傳媒表達意見。
佘繼標在內地營商多年，認識不少同樣在大陸做生意的香港中小企商人，指不少人對修例感到憂慮：「中國大陸咁多年來，個情況係唔畀錢就辦唔到事。喺大陸做任何事都要賄賂，係不明文的規定。」他憂慮一旦修例通過後，曾在內地賄賂官員的香港中小企，隨時都會被引渡回內地。
他稱，在內地不論買地還是建廠，都要「回佣」給代理人，「你唔畀錢，就買唔到地、起唔到樓。你買塊地係10億，你可能在發票寫3億，另外嗰7億你要畀個代理人。你唔使理佢係邊個，總之畀完錢之後塊地就轉你名，唔畀就做唔到。」他又說，在內地營商要向不同部門申請各種牌照，並以生產疫苗為例：「你整個疫苗，唔畀錢就拎唔到牌照。畀咗錢，唔合格嘅疫苗都攞到牌；唔畀錢，你本身合格嘅疫苗，對唔住，冇冧把（指無法申請）。」
佘繼標又舉例，地方政府可隨時找個名義，指港商誤觸法規，如報關不清晰等，要求港商畀錢學習如何「過關」，「佢收錢，叫人教我哋點做，然後先批個牌你。收我幾千就教育費啫，收我幾千萬，嗰啲就唔係叫教育費，叫『為難費』。」他說，由70年代末港商開始北上至今，情況多年沒有改善，只是行賄的方法由以往明目張膽，到現在變得稍為低調。
佘繼標稱，他在周二的會上向李家超提出類似上述的擔憂，惟他指李家超沒有正面回答，但指李有提到內地法例，要獲國家某個層次的級別批准才可以提出引渡。他引述李家超說「大陸官員唔會咁麻煩用呢條條例，來香港引渡我哋呢啲人返大陸。」、「如果你哋犯咗法，繼續成日喺大陸出入，佢都唔使引用逃犯條例拉你；呢條法例係話，你犯咗法，唔上大陸，佢先嚟捉你哋。」
佘繼標卻認為，修例目的是針對中小企。他指，政府稱不會因政治理由移交逃犯，至於大商家不會親手處理行賄交易，無須擔心，「咁政治犯唔拉，有錢佬佢拉唔到，咁佢拉邊個呀？高危一族，就係中小企業。」他甚至質疑，修例的主要目的，是為了收回香港商家在內地的土地。
他指，許多港商2、30多年前在內地買下土地，現租予內地小型公司收租。由於港商身分只是業主，較少踏足內地，難有痛腳予人抓住，但一旦逃犯條例通過後，地方政府隨時可以追溯港商多年前的行為，提出控告，「嗰時起樓、做消防、通水電，你唔畀錢（意指賄賂）都做唔到，佢就搵個多年前嘅理由，話你俾回佣，捉你上去。」
佘繼標又質疑地方政府或會與地產商聯手，若地產商看中了某塊地，就賄賂地方政府官員，由官員提出某些罪名說要控告港商，再勸喻港商平價賣地息事寧人。
儘管對條例感到擔憂，佘繼標卻稱支持條例，但指目前內地的貪污狀況尚未改善，不少港商都被迫賄賂，故希望條例可以延遲數年，待情況有所改善才實施，「押後3、5、7年，等國家能夠反貪腐倡廉，中央執法做得好先執行條例，而且希望之前嗰啲就唔好追究。」他更稱最近成立了一個香港小微企業聯合會，提倡「支持國家反貪腐倡廉，由香港小微企業做起」，希望中央能大力肅貪。
對於政府剔除9項商業罪行，多個大商會稱歡迎，認為能夠釋除市民的疑慮，惟佘繼標卻認為：「佢（商會）邊度有釋除疑慮？一啲都冇，佢都係擔心，大小商會都有疑慮。」在中聯辦開腔挺修例之後，經民聯及自由黨等商界大黨開始歸隊，佘繼標認為政黨到最後都會歸邊，條例通過的機會十分大，形容「而家好多中小企都腳軟」，但政黨卻沒有完全表達中小企的擔心。他指，大商會、政黨均無法全面表達中小企的想法，故他希望透過傳媒表達憂慮。
被問到他是否自由黨黨員，佘繼標稱：「不記得，可能2、30年前有入過」。
他最後自我幽默一番：「我哋嚟緊可能有5萬、10萬人，犯同樣嘅一條法例，唔知大陸會唔會有咁多官員嚟做引渡呢？可能要增加人手。」既然如此擔心修例通過，那會否考慮上街呢？他避而不答：「唔知，我一個人有咩用，去同唔去，一個人冇咩作用。」
觀看原文： 按此連結
