張芯薰講牛年運程 劉德華屬牛小心揸車 馬國明屬虎穩步上揚 鄭欣宜屬兔桃花旺 許廷鏗屬龍壓力大

年頭年尾又係請教師傅嘅時候。YAHOO TV《娛樂訪談》趁住年尾搵到同梁思浩一齊做玄學節目嘅張芯薰師傅嗲兩句，當然會贈埋各位生肖運程。

先介紹入行經歷，張芯薰坦白話呢個名梗係唔係真名，本來唔諗住入行，但係因緣際會之下十幾歲嗰陣遇到恩師，對方同張芯薰輸賭，寫低未來一個禮拜會發生咩事，如果有任何一樣唔啱嘅，大家當冇見過；但係全中的話，就要斟茶拜師。結果每一日際遇都準到驚，返學都唔敢，去到第5日張芯薰拎住袋橙去搵師傅。自問唔係天資聰穎，張芯薰同恩師「打定底」，對方回佢一句「天下間只有懶人冇蠢人，你可以將勤補拙」，就咁踏上玄學之路。

好嘞，講返牛年運程，先講犯太歲嘅牛，同埋跟住嘅虎、兔、龍！

屬牛 （藝人︰劉德華／森美）

師傅劈頭第一句就話屬牛嘅人牛年要小心，千祈唔好樹大招風，記得收歛鋒芒。而揸車同操控機器嘅朋友要小心，甚至話如果架車撻唔著就搵人幫手，因為牛人黑仔！張芯薰特別叮囑1973年嘅朋友揸車方面唔好亂嚟，乖乖地！咦，正正係1973年出生嘅森美，呢期好興玩懷舊電單車，閒時就揸架鐵馬出巡，聽實啦！

屬虎（藝人︰林志玲／馬國明／菊梓喬）

張芯薰話唔少虎年人舊年叫苦連天，好在今年有幸運之神睇住，但都提醒唔好恃住好運目中無人，而事業、愛情同財運都會穩步上揚，有貴人幫手，會追返上年失去嘅嘢，而下一年本命年又會有新景象。大家都好想佢成家立室嘅馬明，會唔會今年傳喜訊呢？

屬兔（藝人︰蕭敬騰／麥美恩／鄭欣宜）

兔人上年都係多阻滯，過得唔開心，但係今年連師傅都恭喜你！佢話運氣上兔人三甲唔不入，但係一啲都唔差，同人溝通方面有改善，少咗是非多咗讚美，可以把握機會，而且桃花運好，單身或者準備結婚嘅可以準備下！

屬龍（藝人︰梁詠琪／側田／許廷鏗）

講到屬龍師傅拎起筆記揭揭下仲講咗句「龍就大件事！」，仲問現場有冇人屬龍！吓？

今年生肖屬龍嘅朋友犯太歲，工作壓力大，好辛苦好多挑戰，拍拖冇結果，冇辦法拉埋天窗……不過整體上有70分，因為財運ok，未至於發達但起碼係苦中一點甜，所以唔駛灰心。

按此下載全新應用程式Yahoo APP，並以Yahoo電郵免費登記成為會員，即時可完成簡單任務賺取Ypoints，憑分即可換領不同獎賞！ 新人更可即時換領限量新人禮，立即下載！