雅虎香港新聞 
《律政強人》世界仔曹永廉 娛樂圈浮沉23年
曹永廉這個名字，細個有電視撈飯的你，一定知佢係邊個。不經不覺加入娛圈已23年，曹永廉不論男歌手、男主角、男配角、客串都一一做過，可惜一直浮浮沉沉，「大紅大紫」與佢一直緣慳一面。其實早前《公公出宮》中，佢飾演乸型太監一度彈起，而今次在《律政強人》中佢飾演嘅任偉樑(Duncan) 同樣相當搶鏡！唔講唔覺，曹永廉今年已經51歲，未知2016是否其豐收之年？
Text: aMan & Richard | Photo: 網上圖片 | 原文：新Monday
識食一定食MAGGIE姐
《律政強人》中，曹永廉有Maggie姐(何綺雲)做SP，真係大飽性福！不過單單一個Maggie姐又點滿足到佢？佢另一方面暗搭Martha（黃智雯飾），得閒都有摸吓手仔抽水，不過就暫時未食到住，唔知以後仲有冇機會呢？
城府極深 並非全心全意幫KC
在劇中，KC係Duncan嘅恩人，而Duncan亦視他為恩人兼師傅般對待。但你當人係狗，佢又點會對你完全忠心呢？Duncan與KC嘅關係錯中複雜，相信兩人之間的對手戲與火花會愈來愈多。尤其是Duncan城府極深，在KC與張強的鬥爭中，如何左右逢源，如何在漩渦中存活下來，將會係佢最著緊嘅事。
23年娛樂圈生涯
回到2000年，曹永廉在《妙手仁心II》中飾演小男人醫生向眾仁，得到觀眾一致認同及讚賞，以為「機會嚟啦曹永廉」，點知得到大家認同但一無所獲。佢在訪問曾表示；「心有不甘又可以點？」，到底喺娛樂圈嘅23年，係點樣行過㗎呢？
出道前苦練歌喉
94年毅然由sale轉做歌手，喺一次歌唱比賽中被發掘加入樂壇。出道前甘願喺冇收入嘅情況下，秘密苦練歌藝兩年先正式加入娛樂圈。成為歌手之後，出過《情深款款》、 《唯一的女神》等5張唱片。翻查資料，當年佢出道時已經29歲，不過因為童顏嘅關係，唔講仲以為佢得17、18歲。有網民更指：「佢曾經同劉文娟（1989年夢劇院二人組合成員，另一人是李敏）拍MV，我當時以為劉文娟拖住個細佬出來拍MV，但原來佢出道時已經成三張嘢。」
題外話，曹永廉行內朋友多，不過他就表示過同鄭嘉穎最老死，因為入行前佢哋一齊跟戴思聰學唱歌。
95年開始拍劇
不過歌手事業未見起色，接住加入TVB參演電視劇集。第1部作品《 親恩情未了》已做男配角（同劇有魏駿傑、鄭秀文等），之後就到《廉政行動1998》。
戶口得番幾百蚊
97年市道低迷，曹永廉直言當時冇job做，戶口由6位數字直插得番幾百蚊。所以當99年佢憑《雙面伊人》飾演反派開始令觀衆留意嘅時候，有監製搵佢拍劇，就有幾多接幾多。
《妙手仁心II》 向眾仁以為會紅
頭先講過，連佢自己都諗住「機會嚟啦」，以為《妙手仁心II》嘅向眾仁會令他成功彈起，可惜世事係無絕對嘅，佢訪問都有講：「向眾仁除咗令更多人認同我之外，套劇播完一樣得個吉，完全冇額外嘅job做，繼續霉落去。」唉，都咪話唔灰！
又再浮沉
《妙手仁心II》蕓花一現之後，繼續密密做，拍了多部電視劇《倚天屠龍記》、《戇夫成龍》，直到《妙心III》出現，曹永廉與邵美琪兩人之間條感情線，令他再受注目，終於等到不少「搵真銀」的機會。
增髮代言
07年等到他第1個代言廣告——哈佛增髮，之後更密密接多個登台show，接登台show令他最開心的除了錢，更是可以再嚐歌手滋味。
娶姜大偉女
事業起飛，07年更娶拍拖5年多，姜大偉長女姜依蘭。雖然當年外父曾豪氣講過：「禮金可以唔收，但酒一定要擺。」被指0蚊娶老婆…… 不過曹永廉一於少理，一直同老婆sweet到而家！
密密做創業
曾經走過人生低潮，自爆過有人找過他拍III片，又話過想做番sale，最後諗通，決定密密做，密密拍，更試過與友人合伙投資「茶記冰室」、火鍋店等等，養得起屋企，有屋仔、車仔、BB仔、老婆仔已經好滿足。
演公公上位
事隔又幾年，曹永廉不再求男主角、代表作，只係密密接劇，多勞多得，直到《公公出宮》，做乸型公公入型入格，網民like爆之餘，更指他絕對值得攞最佳男配角。
高登改圖
題外話，喺Google打「曹永廉」就會出現埋「高登」兩個字，皆因佢都有張經典改圖！而呢張圖就係來自5條喺高登流傳嘅經典IQ題：「因為有一日曹永廉係梵蒂岡見到一個叫小明嘅守門員揸住部榨汁機跑得好快」……明就明，唔明就明，唔使explain咁多！
經典歌
最後為大家送上幾首曹永廉嘅經典歌，都幾情深款款㗎！
〈情深款款〉
〈不惜一切〉
〈唯一的女神〉
全文完
延伸閱讀：
