8大必試片皮鴨！超平$178/隻、特色北京填鴨三食

相信都冇乜人可以抵抗到片皮鴨嘅魔力！熱辣辣鬆軟嘅餅皮，包裹住香脆又充滿油香嘅鴨皮鴨肉，加埋香甜嘅醬汁真係冇得輸～香港唔少中菜館有供應片皮鴨，有賣抵食嘅亦都有賣精緻嘅，今次精選咗8間畀大家睇下邊間啱你口味。

外脆內嫩多汁 鴨大哥

人稱廚魔嘅香港名廚Alvin Leung開設嘅中菜，北京烤鴨選用3公斤美國種北京鴨，肉質特別鬆化。然後放入澳洲訂造嘅高溫磚爐烤40分鐘，比起一般做法更短時間，肉質保持嫩滑，皮脆多汁。醬汁有蒜頭、海鮮醬等，香濃惹味。

抵食之選 富東閣海鮮酒家

沙田街坊必食嘅街坊酒樓，咁出名嘅原因係因為佢好食又抵食呀。$178就可以享用原隻片皮鴨，鴨皮脆冇肥膏又多肉，餅皮都做得夠薄，呢個價錢嚟講超水準！難怪成日要排隊。

一鴨三食 沙田18

想享受多滋味，一定要叫個片皮鴨三食，包括傳統包薄餅食法，仲有生菜片鴨鬆同紹菜豆腐鴨骨湯。鴨皮唔使講，脆卜卜嘅口感加上鴨油香好有驚喜。濃郁鴨鬆配生菜都恰到好處，紹菜豆腐鴨骨湯嘅鴨香同豆味都好突出，出色！

酥而不膩+黃金鴨件伴魚子醬 京滬佳餚

片皮鴨製法一反傳統採用西式嘅蒸烤風爐燜烤製作，鴨坯需先喺零下18度嘅環境中冷凍一個星期，令皮下脂肪均勻凝結成塊，上皮後放入晾鴨櫃進行抽濕風乾排酸。長達36小時嘅熟成，令鴨胚減少水份，凝聚皮下脂肪。之後用230度高溫烤製長達70分鐘，令烤鴨皮酥脆而不油膩。黃金鴨件伴魚子醬都係必食，酥脆厚身嘅烤鴨皮上放上滿滿魚子醬，層次更豐富。

煙燻片皮鴨 囍公館

傳統北京烤鴨做法，不過師傅就覺得平時我哋食片皮鴨嘅時候都會被一條條嘅青瓜同大蔥搶晒味，所以呢度就將青瓜及大蔥磨成蓉，咁就突出到鴨嘅香氣，夠晒細緻。

大件夾抵食 老掌櫃東北菜館

長期都有人排隊嘅東北菜館，$168有半隻，份量都幾多，鴨皮算香脆嘅，不過油香就差緊少少。溫馨一提記得預訂片皮鴨呀，唔係有機會冇得食。

片皮鴨一口酥 新榮記

主打台州菜但同時供應片皮鴨，鴨色澤紅潤，皮脆肉嫩，肥而不膩。最先切落嚟係鴨胸上嘅皮，又名一口酥，點砂糖食令人驚喜，入口即溶充滿油香。剩餘嘅部份會製成椒鹽鴨架，鹹香惹味。

Juicy有油香 稻成京川滬

味道正宗，鴨肉juicy有油香，加上秘製醬汁、青瓜同蔥絲。最值得一提係個皮真係非常薄，所以食多幾件都唔會太滯，啱啱好。

文: Yanica