怪招開檔 老公唔睇好 劉小慧霸氣賣內衣：因為我鍾意

組合草蜢成員蘇志威及太太劉小慧以夫妻檔首戰工展會做檔主，不時落舖打躉化身推銷員，小慧嗌到失聲，從未擔心不能回本，只怕一鋪清唔夠貨。而蘇志威亦肩擔搬運重任，事事親力親為。

日前劉小慧兩公婆被「野生捕獲」，雖然攤位「的骰」，但五臟俱全，除了出新招賣內衣褲之外，還有和牛、自家製花膠湯包，見小慧一時忙於幫Model公仔換內衣褲，一時見有客到就落足嘴頭狂Sell，內外兼顧。2人受訪時大耍花槍，小慧笑言一開始曾被老公質疑何以賣內衣褲︰「佢話我好奇怪，點解賣嘢食又走去賣內衣褲，就係因為我鍾意！」老婆霸氣十足，蘇志威即認「衰仔」︰「當街當巷擺晒出嚟，人哋會唔會埋嚟揀？好似好尷尬又冇得試，但原來我錯晒，佢不知賣得幾好！」

做大笪地女王

小慧透露暫時內衣褲銷情最理想，率先「跑出」，她信心十足沒擔心過回不了本，只怕太好賣冇貨，她說︰「開始幾日又未賺到錢嘅。（今次投資咗幾多位數字？）冇乜點投資，廠家咁啱係跟咗我老公幾十年嘅Fans，做呢啲利潤唔會太高，未試過做線下零售，好鍾意做『大笪地女王』，真係好好玩！」蘇志威指老婆即使做不了工展會小姐，也可以做工展銷售女王。

吸客嗌到聲沙

因開檔不時要叫賣，小慧自爆開工首天已聲沙︰「平時開Live一次過對一千幾百人，依家係一對一，有好多人排隊等住我Sell，加上戴住口罩，搞到講嘢大聲用錯力。」打趣問有甚麼「出口術」招數？蘇志威為妻搶答︰「佢考天才波咋！」問到有今次經驗後，會否心郁郁轉戰開街舖？他們笑說未有諗到太長遠，若然是期間限定店合作也可考慮。