愛回家︱楊明登場累首周收視暴跌？疑利用角色洗底網民唔賣帳表示將棄劇

TVB處境劇《愛·回家之開心速遞》向來都係收視之冠，搞笑又溫馨嘅劇情深得觀眾喜愛，更不時加入新角色帶來新鮮感，不過日前楊明正式登場，疑似引發「楊明效應」，收視暴跌1.7點，最高收視僅20.9 點 （134 萬觀眾），更被張振朗、龔嘉欣主演嘅新劇《靈戲逼人》最高收視21.7 點（139 萬觀眾）奪走榜首排行。

楊明出獄之後被TVB安排加入《愛·回家之開心速遞》劇組，並於上周一（3日）《愛·回家之開心速遞》正式登場，飾演大龍生世敵雷公（白彪飾）親生仔「虹豆沙湯遠」；角色為人戇直敦厚，充滿正義感，與楊明過往所飾演嘅角色有唔少反差，令網民懷疑TVB想利用呢個角色幫楊明洗底。但一班觀眾似乎唔賣帳，仍然對楊明充滿負評，甚至表示將棄劇：「楊明擺明醉酒駕駛，仲可以上電視？品行有問題」、「醉駕真係一單都唔可以有，作為一個公眾人物，仲要係8點黃金檔時間出現, 我替TXB可惜」、「其實真係唔鍾意佢做戲！而且佢真係無資格加入套劇度！佢真係唔適合！講真！真係好唔想見到佢！」、「以後雷公同熊家條綫可以bye bye唔洗睇」、「楊明趕客」等等。不過，都有網民覺得楊明已服刑，理應畀個機會佢。

未知係咪真係與「楊明效應」有關，不過過往4星期《愛·回家之開心速遞》收視維持於22.1點至22.6點，但楊明開始出現嗰個星期就僅得20.9 點；而TVB於YouTube頻道上戴精華片段，有楊明出場嘅片段明顯比平日嘅片段點擊率低。於是網民大膽提議改劇本以救亡收視，創意十足：「佢係咪演監躉？」、「定一名不小心駕駛兼拒絕吹波仔落車腳fing fing嘅司機？」、「楊明應該在愛回家裏飾演一名犯了酒駕罪的因犯。」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！