愛回家｜傳「送水輝」許家傑秘戀「Elaine」李芷晴 二人否認拍拖緋聞

TVB處境劇《愛·回家之開心速遞》深得觀眾喜愛，劇集更造就多對受歡迎嘅CP，例如「大小姐」林淑敏與「送水輝」許家傑，二人喺《萬千星輝頒獎典禮2021》更勇奪「最受歡迎電視拍檔」獎。雖然許家傑多次透露有女朋友，不過一直未有公開女友身份，較早前曾與林淑敏傳緋聞，去到近日有報道指許家傑與同劇嘅「Elaine」李芷晴喺銅鑼灣嘅餐廳食飯兼前後腳入戲院睇戲。

「送水輝」及「Elaine」喺《愛·回家之開心速遞》嘅劇情根本大纜都扯唔埋，前者係接龍集團餐飲部總監，又已經同「大小姐」結婚，而且仲要非常恩愛；至於後者就係尋寶圖嘅職員，同時亦已經同「Andy」拍緊拖。對於今次嘅緋聞，二人都齊齊否認，許家傑就話自己唔係追求佢，大家只係普通朋友，至於被雜誌影到嘅係電影優先場，當日有好多藝人朋友出席，除咗佢哋兩個之外，仲有簡家麒及何泳芍。被問到有冇發展空間時，許家傑就表示雖然自己係公眾人物，不過私人生活就想保留返俾自己；而佢自己係演員，會盡力做好作品俾大家睇。而李芷晴就話許家傑除咗係普通朋友之外，亦係一個好好嘅前輩。至於有冇發展空間，佢就唔會諗太多，因為現時想專注喺工作上，最近《愛·回家》入咗尋寶圖，演出機會增加，下個月亦會參與新劇拍攝，要開始準備溫習劇本，希望可以表現更多畀觀眾睇。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！