憑《降魔的》些粉彈起 效力無綫20年趙永洪離巢

喺無綫劇集《降魔的》中飾演「些粉」一角嘅趙永洪，喺醫院爆喊嗰場戲被網民激讚，知名度大增。再加上近期超高曝光率有《翻生武林》、《果欄中的江湖大嫂》、《三個女人一個因》等，令一班觀眾對佢印象加深。

唔經唔覺佢已經入行20年，最近亦決定離開無綫加盟蕭定一中國數碼娛樂做旗下藝人。

趙永洪於1999年加入第13期藝員訓練班，同期有林峯、楊怡、徐榮及楊明等人。趙永洪無其他同學咁順利，咁快成為一、二綫藝人。佢由跑龍套做起，默默咁做，直至近年先捱出頭來，而家先有觀眾喺街上認得佢。遲下觀眾好難喺電視見到趙永洪啦，想支持佢只可能去戲院啦。