懶理畀人話抽水 藝人大膽講政治

大多藝人都對政治閉口不談，但就畀人話佢地唔關心社會，但又有藝人提及政治嘅時候，就畀外界話佢地抽水搏出位，真係左右做人難。不過，圈中唔少藝人就一於懶理閒言閒語，做自己為政治發聲～近日因為發表一連串政見而喺網絡頻頻曝光嘅麥明詩就係代表人物。

有「十優港姐」之稱嘅麥明詩學歷高就係人都知，大學讀法律系嘅佢雖然外表斯斯文文，但其實十分敢言。早前七警案判決，社會對判囚結果出現分歧，有部分人覺得判決唔合理，麥明詩身為藝人，竟然喺呢個敏感時刻就企出嚟，對判決結果作出評論，令好多網民都覺得佢好有智慧同好勇敢！但佢嘅言論同時都好多人批評，佢嘅前男友林作仲高調出文嚟串佢，話佢恃住高學歷而講啲「阿媽係女人」嘅言論去令人覺得佢係聖人，認真小器～不過麥明詩一於懶理，日前就批評虎媽要求小朋友考TSA要攞A，話基本能力重要過讀書分數多多聲！

何韻詩

何韻詩藝人何韻詩對雨傘運動定同志平權等等政治議題都非常關心，佢唔單止親力親為，仲不時喺社交媒體出文發表意見。就好似之前佢獲邀同一個護膚品品牌合辦音樂會，但無故被放飛機一事，原來品牌因為受到內地壓力而取消同阿詩合作，疑似政治打壓，所以阿詩即刻發表嚴正聲明去抗議。網民對於阿詩掂政治呢件事反應兩極，有粉絲就覺得佢好關心香港局勢，更加為咗堅持自己嘅信念而甘願被封殺，好勇敢 。但同時有一班網民就覺得佢係借政治抽水，分明係谷人氣。但點都好，阿詩有自己想行嘅路，咪由得人做自己想做嘅事囉～

張敬軒

張敬軒廣州出世嘅張敬軒因為家庭背景，加上成日對香港政治點評，所以令好多網民都唔太妥佢。佢曾經大膽談及六四、國民教育等政治議題，喺反國教嘅時候，佢親自帶食物去探訪絕食學生，仲出post話：「香港，你是中國民主的最後一片淨土，請你堅強，好好保護自己，不讓下一代不明不白地愛國。」隨即引嚟中港網民互轟，內地網民就怒斥軒仔忘本，話佢開口埋口講政治；香港網民對於向來較親建制嘅佢竟然支持絕食學生感到驚訝，不過都欣賞佢敢言。雖然最近軒仔準備要去外國讀書，少咗談及政治，但無論點都好喇，佢有自己諗法，都要學識互相尊重。

洪卓立

洪卓立最近同女友湯怡周遊列國，仲拍曬片同大家分享佢地旅程嘅一點一滴。唔好睇佢淨係掛住拍拖，但其實立立都好關心政治。就好似前年雨傘運動嘅時候，當時好多人都上街抗爭，而立立都有份喺社交媒體上發表下心聲。當時，佢痛斥：「我覺得真正死去的，是某些人的良心，警察每天操練就是用作今天強暴地對待手無寸鐵的學生?」，呢個post一出，即刻引起好多迴響，唔少網民就批評佢藝人身分講政治係抽水搏出位，佢見狀即刻出post回應，反問「藝人唔係香港人？」，仲話唔鍾意佢唔緊要，但焦點應該放返喺香港嘅現況。

圖片來源：麥明詩@微博、何韻詩@Facebook、張敬軒@Facebook、洪卓立@微博