拍打戲最緊要型！ 陳家樂千年巨筋 擺靚甫士攞彩

陳家樂形容自己擁「千年巨筋」，身體柔軟度欠奉，最近學懂拍打戲竅門，大方與新劇拍檔陳曉華分享。他又透露正籌備婚禮，落實日子會公布。

陳家樂、陳曉華與譚凱琪等昨日出席無綫新劇《異空感應》開鏡拜神，監製王心慰指劇中不乏危險鏡頭，故出動兩隻燒豬祈福。家樂透露與陳曉華於劇中由鬥氣冤家發展成戀人：「感情線去到最後幾集。（你係咪要打？）好彩我今次用腦多啲。」

陳曉華表示事前有跟武指學功夫：「上咗一個月速成班，但開廠唔夠瞓，反應慢咗。之前我拍完《迷網》覺得自己啲動作戲太差，走去學跆拳，學咗兩年幾考到黑帶。（試過擊退色狼？）我通常用音波功，或者勁啤住對方就得喇。」

正籌備婚禮

而家樂自言是「硬骨頭」：「我係千年巨筋，出晒名拉唔到筋，太實淨喇！我都拍過動作戲，好似之前喺內地拍古裝都有動作場面，我扮妖精，未試過化兩小時妝開工，大家睇嗰陣時可能唔認得我。今次返內地拍戲學到嘢，原來拍打戲要拍得好睇，最尾擺個靚甫士唔可以慳，即係又要打得又要睇得。」又稱正籌備婚禮，有幾個心水「吉日」，但仍未落實。

至於首次演督察的譚凱琪相隔約1年再拍劇，她開心說：「係減咗產量，要留時間畀小朋友，但我覺得開工好似畀自己抖氣咁，Keep住工作唔會脫節。」又自嘲大懵，早前為兩歲囡囡報學校，經常忘記各間學校截止報名日期：「好彩佢係細B，今年搞唔掂嘅話，可以出年先返學，我係唔想埋沒佢嘅潛能，所以畀佢試吓。」