拖走佬篋入院 如去Staycation 黎諾懿添7磅B仔「小冬牛」

黎諾懿與前港姐太太李潔瑩的第2名兒子「小冬牛」昨日出世，重7磅，母子平安。不過，再做老竇的他未能放「產假」，今日已要出席活動，努力搵奶粉錢。

黎諾懿太太李潔瑩昨日於半山嘉諾撒醫院開刀誕下第2胎兒子，取乳名「小冬牛」的BB重7磅。再做老竇的黎諾懿感謝太太預早送上聖誕禮物，表示會好好答謝老婆，覺得現時有兩個小朋友已經完美，太太將會「封肚」不會再追生女兒，他說：「再做爸爸感覺輕鬆啲，但係小朋友出世嗰刻都好期待、好緊張，第一眼覺得『小冬牛』同『小春雞』峰峰細個好似樣，今次冇乜蝦碌喇，同佢拍咗好多片。同大仔一樣，佢一開眼就係望到我，傳說話第一眼望到嗰個會勞碌啲，所以我都要努力搵錢養佢哋。」

細仔取乳名「小冬牛」，黎諾懿笑言意念跟大仔一樣，他說：「哥哥係春天出世嘅『小春雞』，所以細佬冬天就叫『小冬牛』。」

而於昨午1時許，他拉住「走佬篋」陪太太到達醫院準備「卸貨」，兩公婆神情相當輕鬆，有如去Staycation一樣，黎諾懿說：「好輕鬆，尋晚漏夜仲諗緊個乳名、英文名，中文名就收窄咗範圍，諗到奕、辰呢兩個字。」他表示會陪太太入產房，但對「剪綵」則耍手擰頭，即被老婆取笑：「上次佢都係匿喺我身邊。」

專心安撫大仔

李潔瑩指老公再做爸爸已沒有那麼緊張，已升呢為熟手爸爸的他則說：「唔使學餵奶、掃風、換片，仲請咗24小時陪月，當然輕鬆得多，反而係要好好安撫『小春雞』情緒。」