雅虎香港新聞 摩羯｜議員率先獲陳國基通知「上落波」時間被質疑 狄志遠相信對方想交代政府積極工作｜Ray Online
颱風襲港期間，市民都係要睇實天文台公布了解「上落波」安排。不過，原來政務司司長陳國基向議員短訊預告安排，仲快過天文台對外公布，被質疑做法係咪恰當。有份收到短訊嘅新思維立法會議員狄志遠相信對方係想交代政府積極工作，而唔係畀議員再對外發布訊息。
狄志遠今朝喺電台節目透露，噚日朝早未到10點收到陳國基私訊，話將會喺晏晝5點半至6點半改掛8號風球。比起市民得知嘅喺4點至7點掛8號波，縮窄咗個範圍。而喺今日，打工仔都要較定鬧鐘留意幾時會落波，方便即刻出門口返工。狄志遠就透露今朝都收到司長嘅訊息，對方交代颱風摩羯嘅風速較預期快，而吹襲香港期間有少數市民受傷，但已經出院冇大礙，更加預告會喺晏晝1點前落8號波。
早在今年5月紅雨已有此機制
電台節目主持聽到覺得好驚訝，反問做法係咪恰當。狄志遠回應話訊息好簡單，只係得幾十隻字，相信陳國基係想交代政府積極工作，用意唔係畀議員再對外發布訊息。狄志遠進一步透露早喺今年5月紅色暴雨導致西貢水浸嗰陣，已經有呢個「機制」，陳國基向議員發私訊，交代政府應對安排、部門分工等等。
