澳門受疫情影響遊客區人煙稀少 劉浩龍鍾意冇人嘅澳門 網民：攞景定贈慶

新冠肺炎疫情衝擊下，全球旅遊業大受影響，澳門亦唔例外，入境嘅旅客大幅下跌，遊客旺區變得冷冷清清。較早前，劉浩龍（師兄）因工作關係前往澳門，完成第五次隔離後便四出搵好嘢食同觀光一番。

劉浩龍喺IG上載多個食物、觀光及行大橋相片到限時動態，首先佢上載出名麵家嘅招牌炸魚片，之後佢就去咗大三巴牌坊拍照留念，並分別寫上：「自拍都冇人阻住」及「好鍾意冇人嘅澳門」。再之後，師兄去咗行連接澳門半島和氹仔嘅嘉樂庇總督大橋，並寫上：「試吓行吓條橋先」及「其實都幾驚 巴士經過條橋會震㗎」。佢仲指呢個行程（大三巴－西灣湖－主教山－行天橋－氹仔－澳門酒店）連澳門嘅朋友都表示可驚訝。

澳們旅遊業遭受極大打擊，唔少旅遊景點已經變得人煙稀少，旅遊業從業員嘅生計亦受影響，但師兄喺呢個時候仲話「自拍都冇人阻住」及「好鍾意冇人嘅澳門」，會唔會唔係幾好呢？一班網民亦對佢嘅言論議論紛紛，留言話：「攞景定贈興」、「佢點諗無人知，但哩句說話，別人聽到係感覺落井下石」及「唔洗迫當然舒服 , 但特別是娛樂圈藝人 , 發文該有分吋。」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！