政Whats噏:巴士內唔戴口罩 區議員同乘客爆駡戰

·1 分鐘文章
葉子祈遭巴士乘客聲討,依然拒戴口罩。
葉子祈遭巴士乘客聲討,依然拒戴口罩。

為阻疫情傳播,政府要求使用公共交通工具嘅乘客需一直佩戴口罩。雖然措施落實近一年,但依然有人唔守規矩喎。周六(8日)網上流傳一段短片,當中可見巴士之內,懷疑係西貢區議員葉子祈,因為無戴口罩而同其他乘客發生爭論。

其實葉子祈喺公眾地方無戴口罩,早有前科。舊年9月,葉出席西貢區議會會議期間,就因脫下口罩而同其他與會人士爆發口角;今年2月葉亦都無戴口罩,走入商場向途人派利是封。至於今日段短片,巴士內疑似葉嘅男子雖遭其他乘客嘅聲討,但仍試圖將唔戴口罩合理化,喺巴士車廂內叫囂「你有無辦法證明我一定係傳播病菌?我有無周圍去噴口水,做出一啲違反公共衞生嘅行為呀?」又指其他乘客既然要報警處理,佢就留待他日上庭先至同法官交代。片中亦有乘客不齒咁話「佢唔係無口罩而係刻意玩嘢。」又有人怒斥「唔好阻住成車人!」

短片出街之後,葉嘅Facebook專頁好快就有人留言鬧爆,又要求葉要就事件公開交代。據悉,葉係於前日(7日)下午搭乘路線796C巴士,期間佢感到口罩侷促於是摘下,引起其他乘客不滿,車長勸其戴返口罩但不果,惟有報警求助。

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能