新聞女王大結局10大看點！馬國明為佘詩曼流淚 李施嬅成「Man姐」2代

TVB台慶劇《新聞女王》即將於下周五（22日）迎來兩小時大結局，佘詩曼、馬國明、高海寧、王敏奕、何依婷等一班演員當日將會到澳門與觀眾一同觀看大結局播出。然而，內地平台早前已率先播出大結局。下文整理出《新聞女王》大結局嘅10大看點；其中，更有男演員驚喜現身，為開拍續集留伏線。

新聞女王大結局看點1：曉薇轉行做兒童院舍主任
曉薇（何依婷飾）因揭發工廈牌照問題被封「正義女神」，不過曉薇選擇離開新聞界，轉行擔任兒童院舍主任。大結局中，陳山聰客串演出精神有問題嘅人士，到幼稚園脅持多名小朋友，最後被曉薇勸說放下凶刀，並成功解救人質。

新聞女王大結局看點2：許詩晴放棄黃金時段主播
許詩晴（高海寧飾）一直不擇手段做嘢，希望坐上黃金時段主播，原來係想爸爸可以認得返佢；自爸爸病重昏迷，Cathy再無爭上位之意，最後更離開SNK成為政府高官，又與護花使者王偉（林正峰飾）修成正果。

新聞女王大結局看點3：Man姐退出新聞界
Man姐對於當年賊王案事件一直耿耿於懷，網上流傳指中槍警員原來未死，不過華姐（車婉婉飾）交咗啲證據畀梁景仁（馬國明飾），令Man姐被警方帶走調查，Man姐澄清真相後亦選擇退出新聞界。

新聞女王大結局看點4：張家妍黑化成「Man姐」2代
張家妍（李施嬅飾）一向為「中立派」，以追求真相及維持公義報道新聞，因報道萬華球會指控教練性侵個案被流放到出版部嘅張家妍黑化，認為要有權先可以做自己想做嘅新聞，於是答應加入權鬥，成為第三勢力，亦升職取代Man姐。Man姐臨走時提醒佢千萬唔好成為當初討厭嘅嗰個人。不過，張家妍愈來愈因權力唔記得做新聞嘅初衷。

新聞女王大結局看點5：劉艷與馬家明創立網台
「初生之犢」劉艷（王敏奕飾）於新聞路上一直堅持初心，視張家妍為師傅，隨張家妍黑化，劉艷都睇唔過眼，決定與馬家明（吳業坤飾）離開SNK，創立網台。

新聞女王大結局看點6：梁景仁為Man姐流淚
Man姐與梁景仁（馬國明飾）一向鬥生鬥死，但始終合作咗咁耐有一定嘅感情，二人終於冰釋前嫌。Man姐喺幼稚園做專訪直播期間身陷險境，梁景仁擔心佢安危不禁流淚，更表示：「我每一次坐喺度，見到拍檔係佢我就好放心。」至於，Man姐離開SNK時，梁景仁亦親自歡送，更對Man姐表示日後再約食飯。

新聞女王大結局看點7：Man姐前男友阿傑現身打破「幻想」傳聞
過往集數中，Man姐與前男友阿傑（譚俊彥飾）每次見面僅得二人，絕無第三者，早前有網民列出種種疑點去猜測阿傑只係活喺Man姐幻想之中，不過譚俊彥直指並無死到。大結局中，梁景仁到阿傑工作嘅車房追問槍擊案之事。阿傑嘅現身打破早前網民嘅傳聞。

新聞女王大結局看點8：「Prime Time小花」拉低新聞質素
SNK無咗Man姐就好似無咗新聞標準咁，由郭柏妍和李芷晴飾演嘅「Prime Time小花」為收視僅報導如《東張西望》形式嘅都市趣聞，拉低新聞質素。

新聞女王大結局看點9：古肇華壓軸出場
飛爺（鄧智堅飾）向方太（龔慈恩飾）表示搵到第二春辭職移民去馬來西亞，古肇華（黃宗澤飾）驚喜出現於SNK大堂。據指，古肇華係由方太派來，不過當古肇華與Man姐碰面時，卻表示：「『飛爺』個位我冇興趣，SNK我都冇興趣，不過我對你呢個『新聞女王』就有啲興趣。因為喺我領域，只有國王，冇女王。」，似為開拍續集埋下伏線。

新聞女王大結局看點10：女主角一樽水泯恩仇
Man姐、張家妍、曉薇、許詩晴及劉艷於幼稚園脅持事件後同場，許詩晴先遞水予Man姐：「辛苦哂，飲啖水」，其後眾人將支水傳來傳去，似是用一樽水泯恩仇。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！