日日都係情人節？ 黎諾懿醉爆暴走 激嬲老婆廢武功

黎諾懿與剛坐完月的太太李潔瑩為節目《諸朋戀友》進行錄影，他指細仔秉承黎家傳統，大年初一發燒入院，慶幸已出院回家休息。他又自爆曾在太太生日飲醉酒「暴走」激嬲對方，潔瑩笑說：「佢依家廢咗武功！」

黎諾懿、李潔瑩、陳展鵬、單文柔及方力申等，昨日在將軍澳電視城為節目《諸朋戀友》擔任嘉賓。諾懿的太太潔瑩誕第2胎後首次公開露面，指目前有陪月照顧細仔，所以尚算輕鬆，而諾懿透露細仔農曆新年期間發燒入院，幸無大礙。

諾懿透露節目中被問到情人節的難忘慶祝活動，他笑說：「我諗唔到，因為日日都係情人節！不過，好難忘嘅慶祝係老婆生日我飲醉酒，仲要走咗出街，佢嬲咗我幾日！」李潔瑩笑言自此以後，老公已廢了武功少飲酒，又「投訴」：「婚前佢都唔浪漫，依家更加唔會，依家叫佢下廚都好難，有朋友嚟先會煮飯！」諾懿即解釋：「依家多咗個細嘅，唔通鋸鋸吓走去泵奶咩？幾掃興！」

陳展鵬攞正牌抖抖

至於展鵬主演新劇《隱門》，近日劇組有外判工作人員確診，他說：「依家可以攞正牌放幾日假過年，劇組外景停咗，淨係拍廠景。自己即刻去咗私家醫院做檢查，咁會安全啲，亦都通知晒見過我嘅朋友，大家唔使恐慌。」單文柔亦擔心老公外出拍劇的安全，又表示較少帶女兒外出，現時最大娛樂是行街市。

另外，「港普之父」諾懿與陳敏之拍片測試普通話聆聽能力，他問：「『翹翹地』（悄悄地）的粵語是怎麼說呢？」敏之說：「一定係靜雞雞。」他即用廣東話糾正：「錯，係靜靜雞，靜靜雞同靜雞雞咁深學問，係語言界嘅藝術。」