日本排核廢水｜Omakase 餐廳轉用北海道九州貨源 主廚「中環姜濤」憂生意跌

【Yahoo 新聞報道】香港政府擬因日本排放核污水而禁止進口十縣水產品，引起水產進口商及飲食業界憂慮。專營廚師發辦（Omakase）日本餐廳、有「中環姜濤」之稱的主廚西村祐弘接受《Yahoo新聞》專訪時指，因應政府預告，已著手尋找其他都縣的海鮮來貨作代替，包括北海道和九州等，以符合政府要求，希望食客安心。一旦禁運範圍擴大，或減少海鮮及增加牛或雞肉菜式。他亦擔心有市民會因核污水排放而擔心日本食物安全，認為「香港嘅日本餐廳生意一定跌」。

中環餐廳《醸・Kamosu》專營廚師發辦，主理餐廳的西村祐弘早前被電台節目主持人陳志雲稱為「中環姜濤」。該餐廳以「割烹」形式為主，晚市13道菜中，約4道菜來自日本的海鮮水產，包括刺身、燒海鮮、炸物等等。

該店另一店主Jimmy指，店內有八成食材來自日本，期餘兩成來自外國，海鮮會在前一晚落單，翌日已可收到「飛機貨」。餐廳會因應季節選取食材，本月菜單約兩成食材由東京豐洲運到，當中包括太刀魚等魚類。

西村及Jimmy均指，收到政府的禁運預告後，隨即尋找其他貨源代替，亦已在社交平台發出公告，「安全第一，呢啲嘢要準備定」。西村指不少日本海產已轉用北海道及九州貨源，「而家北海道同九州就五至六成」，本月菜單中的太刀魚亦已轉成九州貨。他指若實施十縣禁運，估計生意會受影響，具體數額則未能估計，「一定有人會擔心（日本食品）安全，香港嘅日本餐廳生意一定跌」。Jimmy強調：「我哋會跟足policy，應該就唔使太擔心，入到嘅食材都係安全，希望食客喺安全、安心嘅情況下，食到日本嘅味道」。

該店主打割烹，熟食相對較多，並非每一道菜均是海鮮，故影響未算最為嚴重。西村指出，部份壽司刺身店較為傳統，會使用指定地點食材，或一向以某地點或品牌的食材為主打，就會相當受禁運影響，「無咗招牌貨又畀咩人食呢？點收到咁貴呢？」

店主：如食材真係有事都唔敢用

對於政府提早預告若日本排放核污水，則會啟動禁運措施，西村說：「無辦法，政府都係畀個方法香港人唔使擔心」。Jimmy亦強調「安全第一，如果真係有事我哋都唔敢用」。不過兩人均希望「check過之後就快啲放寬返」，「（措施）一個月、三個月、半年我哋都唔係好知」，作為餐飲業界亦只能被動觀望。

除了水產品，店舖的農產品食材，甚至用作刨冰的大型冰磚亦是由日本進口，而農產品過往亦曾由屬擬禁運範圍的千葉及茨城縣輸入。兩人擔心禁運令或由水產品擴展至其他類型食材，甚至範圍擴展至全日本，屆時只好再尋找外國貨源，「如果到時海鮮唔得，可能就要就用多啲牛肉、雞肉，呢啲我哋都要諗定，可能要搵全世界唔同地方嘅食材，到時要唔要加價就真係唔知」。

「無日本食材，點樣叫做日本料理」

西村慨嘆，如果最終所有日本食品均被禁運，「如果無用日本食材，點樣叫做日本料理呢？」，笑言有機會將餐廳短暫轉型為「日本廚師主理的法國菜」。Jimmy亦指：「食物質素方面，做其他嘢好似日式西餐都做到嘅，偏向fusion啲，但就暫時唔叫做日本菜」。