智能愛人｜泰臣演智能保安演技大爆發 網民支持拎最佳男配角

無綫劇集《智能愛人》由李佳芯（Ali）擔正做女一，Ali喺劇中飾演智能機藝人「阿寶」獲網民大讚教科書級數嘅演技。除咗Ali之外，泰臣、簡淑兒及羅浩銘等人亦有喺劇中飾演智能人，表現同樣亮眼。噚晚劇情就講到警方巡查智能人嘅病毒源頭，於是古家儀（麥美恩飾）就帶智能保安Rocky（泰臣飾）四處躲避。Rocky知道自己中毒，但仍喺古家儀身邊默默守護，直至喺學校雜技表演期間毒發失控，最後被警察Angus（謝東閔飾）消滅。家儀將Rocky個頭偷走，並帶到標基（C君飾）舖頭，希望佢可以將Rocky修復，可惜Rocky已經中毒無法修復。唔少網民睇完都大讚泰臣演技出色，肢體動作及語氣都非常到位，絕對係佢嘅代表作，認為佢喺年尾頒獎典禮有望成為「最佳男配角」得主。

泰臣喺劇中飾演上一代嘅智能機械保安Rocky，劇集初期係喺商場擔任保安員，但因破損被送往銷毀。其後標基將佢執回鋪頭，並改裝成新嘅Rocky。後期，Rocky與家儀一吻定情，場面感人真摯又搞笑。唔少網民都紛紛留言大讚佢演技大爆發，例如「今次好驚喜，你先係真正嘅智能愛人」、「你演得好好呀 看到好投入」、「你做得好好呀！」、「真係好中意Rocky，好感動！真係唔捨得你收工吖 如果TVB可以拍一部Rocky和家儀的番外篇就好啦」、「你套劇做得好似，勁」、「你嘅肢體動作一流 你演有腳傷的機械人超似」及「神級演技，祝你得到最佳男配角」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！