曹永廉醒目拆穿網絡騙案 李力持微博出PO澄清及已報警備案

第五波疫情持續擴散，各行各業都受到唔同程度嘅影響，而娛樂圈都不能倖免，唔少藝人工作被叫停，收入大受影響，當中包括曹永廉。曹永廉表示呢兩年除咗拍劇就冇接過其他工作，收入同高峰期比較少咗7成，所以佢就選擇北上搵真銀養家，不過佢日前就險墮騙案。

曹永廉日前收到一個自稱係姓李嘅導演所發出嘅短訊，其實對方初期係聯絡佢老婆姜依蘭，聲稱自己係透過姜大偉得到曹永廉嘅電話，呢位「李導演」就話有戲開想搵曹永廉做男二，男一同女一嘅演員就未定，不過已經落實出演嘅演員仲有谷德昭、黃一飛及林雪等人，並預計喺6月開工。雖然「李導演」講到似層層，不過佢好快就露出馬腳，訛稱「孟達」個親人有腎病，所以好急要錢醫病，仲展示埋同谷德昭嘅對話截圖，話「肥谷」會轉100萬俾佢，不過轉數快只可以轉50萬，所以就問曹永廉可唔可以轉50萬俾佢應急。喺呢個時候，曹永廉就肯定呢個係網絡詐騙，「李導演」肯定係騙徒，佢仲笑話覺得對方係侮辱佢嘅智慧。

之後，曹永廉就話「李導演」扮熟利用佢身邊嘅朋友，同埋到佢有懷疑嘅時候，佢就會用語音同對方聯絡，不過「李導演」只會用文字回覆，只係間唔中send兩條李導嘅語音，不過呢啲語音好似有做過手腳。最後，曹永廉覺得唔對路，於是佢就聯絡真正嘅李導演，而李導演就話最近有唔少人同佢講有人冒認佢。

而李力持就喺微博出PO澄清，除咗拍片否認係騙徒本人及叫大家小心騙子之外，佢仲上載藝人與騙徒對話截圖並稱自己已經報警備案。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！