曾志偉重返無綫自評50分 決意打造TVB成「世界選拔總部」

無綫日前公佈上半年業績，雖然收入微升2％至近12.5億，但上半年仍然虧損2億8400萬元，亦有提到《聲夢傳奇》「在比賽期間全城矚目，吸引了一批年輕觀眾群收看」、「節目結束後仍有大批觀眾追蹤其社交媒體動態」及已著手籌備第二季。今年年頭無綫搵「獎門人」曾志偉同王祖藍返嚟坐陣，並進行一連串嘅改革，而曾志偉首次以副總經理（綜藝、音樂製作及節目）身份出席業績發布會，期間被問到俾自己回巢後嘅成績，佢就笑言50分，未見到成績，仲摸索緊觀眾嘅口味。

曾志偉仲話而家觀眾嘅口味急速轉變，再加上而家娛樂選擇多，而TVB製作嘅節目要適合8個月至88歲嘅觀眾收睇，要合家歡同老少咸宜，題材唔可以太偏鋒。對於ViuTV嘅節目，曾志偉就表示好有興趣參考佢哋嘅成本控制，點樣可以製作便宜嘅節目，同一時間可以吸引觀眾。

另外，ViuTV皇牌選秀節目《全民造星》掀起全城熱話，更捧紅兩隊人氣男團MIRROR及ERROR，曾志偉就指TVB嚟緊會重點發展選秀節目，邀請全球華人嚟香港參加比賽，決意將TVB打造成「世界選拔總部」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！